Kryetari i Lidhjes Demokratike të Kosovës (LDK), Lumir Abdixhiku, ka reaguar ndaj ftesës së kryetarit të Lëvizjes Vetëvendosje, Albin Kurti, për një takim konsultativ, duke e refuzuar atë në mënyrë të prerë.
Në një deklaratë të publikuar në Facebook, Abdixhiku thekson se për LDK-në, fjala është zotim dhe besë, dhe nuk mund të kalohet lehtë mbi fyerjet e vazhdueshme që janë bërë ndaj partisë së tij dhe përkrahësve të saj.
Konjufca: Kemi thënë ta bëjmë vetëm qeverinë – Nuk po duket e mundshme
Sipas tij, LDK-ja ka qenë subjekt i një gjuhe që ka përçuar urrejtje, ndasi dhe fyerje të drejtpërdrejta – duke u quajtur “hajvanë”, “bashkëpunëtorë të Serbisë” dhe duke u etiketuar si të pavlerë për skenën politike. Për Abdixhikun, kjo mendësi ka cenuar thelbin njerëzor dhe etikën e politikës.
“Në politikë, si në jetë, fjalët kanë peshë. Ato janë pasqyrë e karakterit, e vlerave dhe e qëllimeve. Janë reflektim i momenteve që, kur përsëriten, bëhen bindje – shpesh edhe të pakapërcyeshme.
Për ne, në Lidhjen Demokratike të Kosovës, fjala është përgjegjësi. Është zotim. Është besë.
Prandaj, secili – veçanërisht ata me pushtet – duhet të jenë të përgjegjshëm për fjalët që thonë dhe për bindjet që mbjellin.
Për muaj, e në të vërtetë për vite të tëra – para, gjatë dhe pas fushatës – LDK, anëtarët tanë dhe votuesit tanë, kanë qenë subjekt i një gjuhe dhe mendësie që ofendon, përçan, etiketon dhe sulmon. Një mendësi që ka goditur thelbin njerëzor të politikës – respektin dhe dinjitetin. Dhe ka cenuar parimet themelore mbi të cilat ne kemi zgjedhur të bëjmë politikë”, ka shkrua Abdixhiku në Facebook.
Ai theksoi se një takim, edhe pse vetëm konsultativ, do të përbënte një “kapërcim fatal të dinjitetit njerëzor dhe politik” për LDK-në dhe se ky qëndrim vjen si një përgjigje e drejtpërdrejtë ndaj të gjitha atyre që kanë tentuar t’i tregojnë kësaj partie se çfarë duhet të bëjë.
“Duket se fjalët e thëna e bindjet e ushqyera në vijimësi, nuk kanë peshë njëjtë për të gjithë. Sepse, pavarësisht të gjithë gjërave të thëna, të bëra e stërbëra, dje kam pranuar një letër nga Kryetari i Lëvizjes Vetëvendosje, z. Kurti, për takim konsultativ mes nesh.
Sado që unë dhe LDK nuk udhëhiqemi nga inati; sado që ne besojmë në dialog, bashkëpunim e komunikim njerëzor e politik; një takim i tillë – madje edhe konsultativ – do të ishte kapërcim fatal i dinjitetit njerëzor dhe politik.
Mes ‘hajvanatit’, ‘mbytjes së LDK-së’, ‘bashkëpunëtorëve të Serbisë’, mes moçalit të madh të pështymave ndaj nesh – unë, LDK dhe votuesit tanë – nuk e gjejmë veten as për konsultim. Sepse fjalët, si edhe bindjet, kanë peshë.
Fjalët e thëna ndaj nesh kanë peshë. Dhe fjalët tona – ato që u kemi dhënë qytetarëve tanë, atyre që nuk joshen nga spektakli i përçarjes por që besojnë se shteti ndërtohet me respekt e dinjitet – kanë peshën e fjalës së dhënë. Peshën e besës. Besë do të ketë!
Le të jetë kjo përgjigje e qartë edhe për të tjerët që së fundi, duke marrë peshën që nuk u takon, kanë tentuar t’i tregojnë LDK-së se çfarë duhet të bëjë”, ka shtuar kryetari i LDK-së.
Abdixhiku konfirmoi se LDK do të mbështesë konstituimin e Kuvendit më 15 prill dhe respekton të drejtën legjitime të partisë së parë për të marrë mandatin e formimit të qeverisë
“LDK – për ta kuptuar mirë – u qëndron besnike vendimeve, bindjeve dhe fjalëve të thëna para fushatës, gjatë fushatës dhe pas fushatës. Ndaj të gjithëve – njësoj. Sepse fjalët kanë peshë!
LDK e pret dhe e mbështë konstituimin e Kuvendit më 15 prill. Nuk ka dhe nuk do të ketë asnjë pengesë. Prandaj, le ta konstituojmë Kuvendin e Republikës. LDK njeh të drejtën legjitime, demokratike dhe kushtetuese të partisë së parë për të marrë mandatin për qeverisje. Dhe në rast të dështimit të saj, njeh të drejtën e secilit për të ndërtuar shumicën. Qëndrimet tona janë të qarta”, ka shkruar Abdixhiku.