Kandidati për kryeministër i Lidhjes Demokratike të Kosovës (LDK), Lumir Abdixhiku, ka reaguar një ditë pas zgjedhjeve parlamentare, duke falënderuar votuesit dhe veprimtarët e partisë për angazhimin në procesin zgjedhor.
Në një postim në Facebook, Abdixhiku u shpreh krenar për rrugëtimin e deritanishëm të LDK-së, duke theksuar se partia ka shënuar rritje, por kjo nuk ka qenë e mjaftueshme për të sjellë ndryshimin në këtë fazë.
“Rritja jonë i jep mundësi e qetësi organizimit më të mirë të brendshëm partiak – dhe për këtë do të qëndroj gjithmonë krenar; por kjo rritje është e pamjaftueshme për ndryshimin e Republikës në këtë fazë – dhe për këtë ndjejë keqardhje”, ka shkruar ai.
Abdixhiku gjithashtu ka theksuar se procesi i numërimit të votave po vazhdon, veçanërisht për votat e diasporës, dhe se pas përfundimit të tij, LDK do të shpallë qëndrimet politike për hapat e mëtejshëm.