Qeveria e Kosovës ka publikuar agjendën e plotë për mbledhjen e përbashkët me Qeverinë e Maqedonisë së Veriut, e cila do të zhvillohet të hënën, më 18 nëntor, në Prishtinë.
Sipas njoftimit nga Zyra e Kryeministrit, delegacionet pritet të mbërrijnë nga ora 10:30 deri në 10:45, më pas zhvillohet një ceremoni zyrtare dhe fotografia e përbashkët e dy qeverive.
Kryeministri i Kosovës, Albin Kurti dhe homologu i tij maqedonas, Hristijan Mickoski do të zhvillojnë një takim bilateral që do të nisë në orën 11:20.
Takimi mes dy liderëve do të pasohet nga takimet bilaterale të ministrave homologë.
Nga mbledhja ndërqeveritare parashihet që të nënshkruhen disa marrëveshje bilaterale mes dy qeverive.
Pas nënshkrimit, Kurti dhe Mickoski do të mbajnë një konferencë për media.
Agjenda e takimit mbyllet me një drekë zyrtare.
