Presidenti i Ukrainës, Volodymyr Zelensky, është përfshirë në një aksident trafiku me veturë.
Kështu ka bërë të ditur zëdhënësi i tij, Sergi Nykyforov, i cili ka njoftuar se presidenti ukrainas nuk ka pësuar lëndime serioze.
“Një veturë pasagjerësh u përplas me automjetin presidencial dhe eskortën e tij në kryeqytetin Kiev”, ka thënë Sergi Nykyforov në një deklaratë të shkurtër.
“Presidenti u kontrollua nga një mjek, nuk u konstatuan lëndime serioze”, shtoi ai, shkruan BBC.
Sipas tij, drejtuesi i veturës që u përplas me autokolonën është marrë në mjekim në vendngjarje dhe është larguar me autoambulancë.
Nykyforov deklaroi se të gjitha rrethanat e aksidentit të trafikut po hetoheshin nga oficerët e zbatimit të ligjit, duke mos dhënë detaje.
Ky aksident ndodhi pasi Zelensky të mërkurën vizitoi qytetin e rimarrë nga Rusia të Izyumit, qendër kjo kryesore logjistike në Ukrainën Verilindore.
Ai ka falënderuar trupat që morën pjesë në një kundërsulm të shpejtë kundër pushtuesve rusë.
Ndërkaq, ditëve të fundit, ushtria ukrainase ka rimarrë pjesë të territorit të pushtuar nga Rusia, duke i detyruar trupat ruse që të tërhiqen.