Kanë kaluar 1 vit e 4 muaj që nga ngritja e aktakuzës ndaj 53 personave, për masakrën e Mejës, në të cilën u vranë rreth 370 civilë shqiptarë gjatë prillit të 1999.
Prokuroria Speciale e Kosovës, në dhjetor të vitit 2023 njoftoi se kishte ngritur aktakuzë, ndonëse asnjëri prej tyre nuk ishte i arritshëm për organet e drejtësisë.
Megjithatë, deri më tash ende nuk është mbajtur seanca e shqyrtimit fillestar. Prokuroria Speciale e Kosovës, ka dorëzuar në fund të vitit të kaluar aktakuzën e përmirësuar, meqë kështu kishte kërkuar gjykata.
GJYKATA THEMELORE NË PRISHTINË shkroi se “Me datë 23.12.2024, në Gjykatën Themelore në Prishtinë – Departamenti Special, është paraqitur Aktakuzë e ndryshuar për gjykim në mungesë ndaj 53 të pandehurve për shkak të veprës penale: ‘’Krimet e luftës kundër popullsisë civile’’ nga neni 142 lidhur me nenin 22 të Ligjit penal të Republikës Socialiste Federative të Jugosllavisë, aktualisht e inkriminuar si ‘’Krimet kundër njerëzimit’’ nga neni 143 paragrafi 1 pika 1.1; 1.2 14; 1.6; 1.8; 1.9 nën paragrafi 1.4; 1.6; dhe 1.7; lidhur me nenin 31 të Kodit Penal të Republikës së Kosovës. Gjykata, me të pranuar aktakuzën e ndryshuar, do të verifikon nëse e njëjta është përpiluar në pajtim me nenin 235 paragrafi 4 të KPP-së dhe pas vlerësimit do të ndërmarr veprime procedurale në bazë të nenit 303 paragrafi 8 të KPPRK-së.”
Por, nga Gjykata në Prishtinë, nuk kanë treguar nëse kanë ndërmarr ndonjë veprim deri më tash, e prokurori i rastit, që është edhe shef i departamentit për krime lufte, Ilir Morina, i tha televizionit se janë në pritje të ftesës nga Gjykata.
Avokati Arianit Koci, thotë se gjyqtarët duhet të kenë konsideratë për raste të tilla.
Arianit Koci – Avokat tha se “Gjykata duhet të i jep prioritet disa rasteve, mbi të gjitha pres që vet gjyqëtarët por edhe ne shoqëria ti përkrahim që të marrin sa më shumë gjyqtarë dhe të zgjidhen këto raste, ju e dini që ka një aktakuzë për masakrën e Mejës, që është deponuar për më shumë se një viti dhe ende nuk është caktuar seanca gjyqësore është kthyer në përmirësim aktakuza sidoqoftë këto raste duhet sa më shpejtë me vepru sidomos në rastet e krimeve të luftës, po vdesin dëshmitarët.”
Por, ish-sekretari në Ministrinë e Drejtësisë, pjesë e këtij institucioni kur është hartuar legjislacioni për gjykimin në mungeë, thotë se caktimi i shqyrtimit fillestar në raste të tilla merr më shumë kohë.
Ardian Bajraktari – Ish-sekretar në MD ka deklaruar se “Prokurori i shtetit duhet të ketë bërë përpjekje të arsyeshme për sigurimin e të pandehurit në procedurë e duhet ta bind Gjykatën se përkundër këtyre përpjekjeve ka qenë e pamundur sigurimi i prezencës prandaj kërkon gjykatës që të vazhdohet gjykimi në mungesë, këto përpjekje ndonjëherë mudn të marrin kohë deri në fillimin e shqyrtimit gjyqësor.”
Kompetencat për hetimin e krimeve të luftës, fillimisht kanë qenë tek UNMIK-u, pastaj tek misioni i EULEX-it, e që nga viti 2018, hetimi bëhet nga Prokuroria Speciale e Kosovës.