Ambasada amerikane në Prishtinë ka reaguar pas sulmit fizik ndaj gazetarit Valon Syla.
Në një postim në Twitter të ambasadës thuhet se sulmet ndaj gazetarëve shkelin parimet thelbësore demokratike.
“Sulmet ndaj gazetarëve ose ndërhyrja në pavarësinë dhe lirinë e tyre të shprehjes shkelin parimet thelbësore demokratike”, thuhet në reagim.
Sipas ambasadës, media luan një rol thelbësor në luftimin e korrupsionit, sigurimin e llogaridhënies dhe transparencës dhe mbrojtjen e të drejtave të të gjithë qytetarëve në një demokraci.
Attacks on journalists or interference in their independence & freedom of expression violates core democratic principles. The media plays an essential role in fighting corruption, ensuring accountability and transparency & protecting the rights of all citizens in a democracy. pic.twitter.com/oRatNIRjGH
— U.S. Embassy Pristina (@USEmbPristina) April 13, 2023
Në anën tjetër, Syla në një intervistë për RTV Dukagjini, ka thënë se personat që e sulmuan atë janë “islamikë fanatikë”.
“Tre islamikë fanatikë më kanë sulmu, shpejt e shpejt ka ndodhë edhe kanë ikë” – ka thënë ai për RTV Dukagjin.
Syla është pyetur nga gazetari Bekim Ibishi se pse mendon se ka ndodhur ky sulm, mirëpo kësaj pyetjeje nuk i është dhënë përgjigje.
Ndryshe, Policia e Kosovës ka arritur t’i arrestojë tre personat, të cilët dyshohet se e kanë sulmuar fizikisht gazetarin Valon Syla, në mbrëmjen e së martës.
Të arrestuarit, sipas Prokurorisë, janë personat e dyshuar me inicialet L.D, K.H dhe O.H. si dhe dyshohen se kanë kryer veprën penale “Nxitje e përçarjes dhe mosdurimit’’.
Siç njofton Prokuroria, të dyshuarit do të dërgohen në mbajtje dhe ndaj tyre do të kërkohet caktimi i masës së paraburgimit brenda afateve ligjore.
Syla ishte sulmuar fizikisht nga tre persona, të cilët, sipas tij, ishin fanatikë fetarë.