Aktorja amerikane fituese e çmimit Oscar, Angelina Jolie, ka thënë se do të largohet nga roli i saj si ambasadore e agjencisë së OKB-së për refugjatët UNHCR pas më shumë se 20 vjetësh.
“Unë besoj në shumë gjëra që bën OKB-ja, sidomos në ruajtjen e jetës përmes ofrimit të ndihmës urgjente”, ka thënë Jolie, 47-vjeçare.
Ajo ka shtuar se do të punoj tani me organizata të udhëhequra nga njerëzit, të cilat janë shumë të lidhura me zonat e konflikteve, dhe u japin atyre më së shumti zë.
Megjithatë, ajo nuk ka ofruar hollësi se me cilat organizata planifikon të punojë.
UNHCR ka thënë se Jolie ka qenë një prej personave më me ndikim që ka luftuar për të drejtat e refugjatëve, raporton BBC.
Agjencia ka thënë se aktorja amerikane ka kryer mbi 60 misione në terren për të dëshmuar historitë e vuajtjeve, si dhe shpresën dhe qëndrueshmërinë.
Në një postim në faqen e saj në Instagram, ylli i Hollivudit ka shkruar: “Pas mbi 20 vitesh, sot po largohem nga puna ime me agjencinë e OKB-së për refugjatët.
“Refugjatët janë njerëzit që i admiroj më shumë në botë dhe jam i përkushtuar të punoj me ta për pjesën tjetër të jetës sime”.
Muajt e fundit, ajo ka takuar njerëz të zhvendosur në Ukrainën e shkatërruar nga lufta, Jemen dhe gjithashtu Burkina Faso.