Gjykata Themelore në Prizren ka refuzuar kërkesën e Prokurorisë që ministrit të Zhvillimit Rajonal, Fikrim Damka, t’i caktohet masa e paraburgimit.
Atij i është caktuar masa e arrestit shtëpiak në afat prej një muaji, pasi dyshohet për veprat penale sulm dhe kanosje.
Sipas njoftimit të kësaj gjykate, masë e tillë i është caktuar edhe të pandehurit tjetër që dyshohet se është përfshirë në këtë vepër.
“Masa e arrestit shtëpiak është caktuar në kohëzgjatje prej një (1) muaji, e cila do të llogaritet prej kohës së arrestimit 09.02.2025 dhe mund të zgjasë deri më datën 09.03.2025. Të pandehurit nuk guxojnë që të largohen nga vendbanimi pa lejen e Gjykatës, si dhe iu ndalohet të kontaktojnë me personat me të cilët ata nuk jetojnë apo nuk janë të varur nga të pandehurit”, thuhet në njoftimin e Gjykatës.
Gjykata ka bërë me dije se nëse të pandehurit e shkelin masën e arrestit shtëpiak, do t’iu caktohet masa e paraburgimit.