Instituti i Kosovës për Drejtësi (IKD) ka reaguar lidhur me arrestimin e të dyshuarve për përfshirje në keqpërdorime me rezervat shtetërore të menaxhuara nga Ministria e Industrisë, Ndërmmarrësisë dhe Tregtisë (MINT).
IKD ka thënë se kjo është rregues “i pranisë së korrupsionit të nivelit të lartë edhe në sferat më të ndjeshme, që kanë ndikim social të drejtpërdrejt në jetën e qytetarëve”.
“Jemi dëshmitarë se në Kosovë, rastet e korrupsionit të profilit të lartë shpeshherë kanë përfunduar pa aktgjykime dënuese, për shkak të mangësive në fazën hetimore – që për pasojë kanë prodhuar aktakuza jokualitative. Prandaj, KDI e sheh si të domosdoshëm zhvillimin e një procesi sa më të detajuar dhe gjithëpërfshirës të hetimeve, në mënyrë që personat potencialisht përgjegjës të ballafaqohen me drejtësinë”, shkruan IKD.
IKD ka vlerësuar si të nevojshëm edhe lirimin nga detyra të ministres Rozeta Hajdari.
“Njëherit, KDI kërkon nga të gjithë akterët, e në veçanti zyrtarët në pushtet, që të rezervohen nga çfarëdo deklarimi apo përfshirje që mund t’a ndikojë procesin e hetimit dhe pavarësinë e institucioneve të drejtësisë”, shkruan IKD.
Gjatë kësaj të premteje janë arrestuar tre të dyshuar, dy prej tyre zyrtarë të Ministrisë së Industrisë, Ndërmarrësisë dhe Tregtisë (MINT) dhe një biznesmen.
Ministria e Industrisë, Ndërmarrësisë dhe Tregtisë ka reaguar në lidhje me arrestimin e tre personave në lidhje me dyshimet për keqpërdorime të rezervave shtetërore, ndër ta edhe dy zyrtarë të ministrisë.
Në reagimin e ministrisë thuhet se e mirëpresin “çdo hetim për rastin e blerjes së rezervës shtetërore”, derisa shtojnë se janë të bindur që furnizimet dhe rezervat shtetërore janë bërë në përputhje me ligjin dhe se nuk ka ndodhur asnjë dëm me to.
Sipas tyre, në muajt e fundit ka pasur përpjekje për ta keqinformuar publikun, të cilat keqinformime sipas Ministrisë janë nxitur nga palë të ndryshme të interesit.
“Për këtë çështje prej një kohë të gjatë e veçanërisht në muajt e fundit ka përpjekje të mëdha që të keqinformohet publiku në vendin tonë. Motivet dhe arsyet për këto veprime të nxitura dhe kordinuara nga palë të ndryshme të interesit duhet të jenë po ashtu pjesë e hetimit në këtë rast”, thuhet në njoftim.
Lexo dhe: MINT: Mirëpresim hetimin, duhet të hetohen edhe përpjekjet për keqinformim
MINT-i ka kërkuar nga organet e hetimit të mos e cenojnë sigurinë shtetërore sa u përket rezervave.
“Ministria e Industrisë, Ndërmarrësisë, pret që organet e hetimit të kenë në vëmendje që krahas punës hetimore, të mos cënojnë në asnjë rrethanë sigurinë shtetërore, për sa kohë që bëhet fjalë për rezervën shtetërore të Republikës sonë, e klasifikuar sipas Ligjit për Rezervën Shtetërore dhe Ligjit për Mbrojtjen e Informacionit të Klasifikuar”, thuhet në reagim.
Tutje, në reagim u kërkohet edhe mediave të mos shpërndajnë lajme të pakonfirmuara, sepse sipas tyre procesi i furnizimit me rezerva shtetërore është bërë sipas legjislacionit në fuqi.
Prokuroria Speciale ka dhënë detaje në lidhje me arrestimin e tre të dyshuarve për “keqpërdorim të rezervave shtetërore”.
Siç njofton Prokuroria, të pandehurit, Ridvan Muharremi, Hafiz Gara dhe Irfan Lipovica dyshohen për veprat “Keqpërdorim i detyrës zyrtare’’, si dhe “Dhënie të ndihmës në kryerjen e veprës penale të Keqpërdorimit të detyrës zyrtare’’.
Lexo dhe: “Afera për vajin dhe grurin”, ndalohen për 48 orë tre të dyshuarit
“Me urdhër të Prokurorisë Speciale të Republikës së Kosovës (PSRK), Policia e Kosovës – Njësia e Veçantë e Hetimeve, ka realizuar sot bastisje në lokacione të ndryshme në Prishtinë, ku kanë arrestuar tre (3) persona me inicialet R.M. H.G dhe I.L. Prokuroria Speciale njofton opinionin publik se tre personat e arrestuar, R.M. H.G dhe I.L. dyshohen për veprat ‘’Keqpërdorim i detyrës zyrtare’’, si dhe ‘’Dhënie të ndihmës në kryerjen e veprës penale të Keqpërdorimit të detyrës zyrtare’’, thuhet në njoftim.
Tutje, thuhet se gjatë bastisjes janë siguruar dhe sekuestruar prova materiale të cilat do të përdoren për procedurë të mëtutjeshme hetimore.