Prokuroria Speciale ka dhënë detaje në lidhje me aksionin e përbashkët me Doganën e Kosovës dhe Inspektoratin Policor në veri në 11 lokacione ku u arrestuan tetë zyrtarë doganorë dhe një polic.
Prokuroria Speciale njofton se kontrolli është bërë me qëllim të mbledhjes së provave dhe ndalimit të nëntë zyrtarëve të dyshuar për veprat penale ‘’Keqpërdorim i pozitës apo autoritetit zyrtar’’ dhe ‘’Marrja e ryshfetit”.
“Dyshimet janë bazuar në një hetim të gjatë të udhëhequr nga Prokuroria Speciale dhe të zbatuar nga Dogana e Kosovës dhe Inspektorati Policor, pasi që nën hetime ka qenë i përfshirë edhe një zyrtar policor. Gjatë këtij aksioni janë grumbulluar prova që mbështesin dyshimin se këta nëntë (9) zyrtarë, tetë nga të cilët janë zyrtar të Doganës dhe një zyrtar policor nga Policia kufitare, kanë qenë të përfshirë në veprat për të cilat dyshohen”, thuhet në njoftim.
Po ashtu, nga ky aksion janë sekuestruar sende tjera të rëndësishme për procedurë të mëtutjeshme hetimore si 20 plumba zyrtarë të Doganës së Kosovës, dhjetë telefona së bashku me katër sim kartela, një pistoletë e kalibrit 9 mm me tre karikatorë dhe 9 fishek, me leje dhe gjashtëmbëdhjetë copë municion jo zyrtar.
Këtë aksion të përbashkët të Inspektoratit të Policisë së Kosovës dhe Doganës së Kosovës të shtunën nën udhëheqjen e Prokurorisë Speciale që ka rezultuar me të paktën 9 persona, zyrtarë publikë të arrestuar e ka konfirmuar edhe zëdhënësi i Doganës, Adriatik Stavilevci.
Nga ai u bë e ditur se polici dhe 8 zyrtarë të Doganës së Kosovës janë arrestuar në lokacione të ndryshme.