Policia e Kosovës, të mërkurën e 19 tetorit, ka njoftuar se ka arrestuar katër personat, të cilët para disa ditësh, janë shfaqur në një videoincizim duke ushtruar dhunë fizike ndaj një personi tjetër në qytetin e Pejës.
Rasti ka ndodhur më 7 tetor rreth orës 12:20, dhe është raportuar në Stacionin Policor në Pejë. Pas angazhimeve, hetuesit policorë më datën 15 tetor e kanë siguruar videoincizimin, dhe përmes tij, janë identifikuar personat që kanë ushtruar dhunë fizike.
Personat të cilët shihen se kanë ushtruar dhunë janë arrestuar dhe kanë inicialet L.M., T.M., S.B., E.A.
Policia ka njoftuar se pas intervistimit të të dyshuarve, me urdhër të Prokurorit, tre prej tyre u është caktuar masa e ndalimit, ndërsa personi i katërt që është i mitur është liruar në procedurë të rregullt.
“Pas intervistimit, me urdhër Prokurorit kompetent tre të dyshuarve me numër rendor (1, 2 dhe 3) u është caktuar masa e ndalimit, përderisa i dyshuari i katërt i mitur (nr. 4) është liruar në procedurë të rregullt”, thuhet në komunikatën e Policisë së Kosovës.