Policia e Kosovës ka arrestuar tre persona të dyshuar për rrëmbimin me forcë të një personi të shtunën e 16 prillit në komunën e Prishtinës.
Sipas raportit 24 orësh të policisë, thuhet se një nga tre të arrestuarit është dërguar në mbajtje kurse dy të tjerë janë liruar në procedurë të rregullt.
“Janë arrestuar tre të dyshuar (dy femra dhe një mashkull) kosovar-e nën dyshimin se të njëjtit janë përfshirë në kryerjen e veprës së cekur duke rrëmbyer me forcë viktimën mashkull kosovar”, thuhet në raport.
Sipas raportit, lidhur me rastin njësitet policore janë në duke kryer hetime intensive.
“Me vendim të prokurorit, i dyshuari (mashkull) është dërguar në mbajtje, ndërsa të dyshuarat janë liruar në procedurë të rregullt”, vijon njoftimi.
Ndërkaq, bazuar në këtë raport, Policia e Kosovës ka njoftuar se 200 kilogramë kabllo elektrike janë vjedhur të dielën në Termocentralin Kosova A në Obiliq.
“Pas marrjes së një informate për një vjedhje të kabllos elektrike nga T.C Kosova A, njësiti policor ka ndaluar veturën e dyshuar me targa vendore të cilën e drejtonte i dyshuari mashkull kosovar. Gjatë kontrollit në bagazhin e veturës është gjetur një sasi e kabllos elektrike prej bakri –rreth 200 kg”, thuhet në njoftim.
Në njoftim bëhet e ditur se njëri nga të dyshuarit është arrestuar, ndërsa tjetri gjendet në arrati.
“I dyshuari është arrestuar, ndërsa një i dyshuar tjetër gjendet në arrati. Me vendim të prokurorit i dyshuari dërgohet në mbajtje”.
Po ashtu, bëhet e ditur se vetura së bashku me kabllon janë sekuestruar.
Ndërkaq, sipas statistikave të përgjithshme të policisë, brenda 24 orëve të fundit është raportuar për një aksident trafiku i cili ka ëprfunduar me fatalitet, 21 aksidente që kanë përfunduar me të lënduar 31 me dëme materiale.
Ndërkaq, në 24 orëshin e fundit janë arrestuar gjithsej 14 persona, tetë janë dërguar në mbajtje.
