Policia e Kosovës njofton se ka arrestuar tre të dyshuar për armëmbajtje pa leje në Ferizaj.
Të shtunën e 29 korrikut, policia kishte informacione se në tri raste të ndara, në fshatin Greme, në fshatin Slivovë dhe në rrugën “Kadri Zeka” të Ferizajt, në ahengje familjare kishte të shtëna me armë të zjarrit.
Policia pas pranimit të informacioneve kishte marrë veprimet e menjëhershme dhe kishte identifikuar tre të dyshuarit.
“Të dyshuarit janë shoqëruar në stacionin e policisë në Ferizaj dhe pas intervistimit nga policët hetues, me vendim të prokurorit kujdestar nga Prokuroria Themelore në Ferizaj, të tre të dyshuarit janë liruar për procedurë të rregullt hetimore, ndërsa janë konfiskuar tri armë zjarri (pistoleta)”, njofton Policia e Kosovës.
Rastet janë cilësuar “Mbajtje në pronësi, kontroll i paautorizuar i armëve dhe përdorimi i armës”.
Me këtë rast, policia rajonale e Ferizajt apelon te qytetarët që të bëjnë kujdes për sigurinë e tyre dhe të tjerëve, sepse përdorimi i armëve të zjarrit në ahengje dhe gëzime familjare mund të shndërrohet në tragjedi, po ashtu është e ndaluar me ligj.