Policia spanjolle ka arrestuar një nga të dyshuarit më të kërkuar në Evropë për pastrim parash. I dyshuari me nënshtetësi të dyfishtë irlandez-britanik u arrestua të hënën në qytetin jugor të Malaga-s pas një operacioni disamujor.
Personi akuzohet për pastrimin e më shumë se 200 milionë eurove, para të paligjshme, për organizatat kriminale në mbarë botën, njofton Euronews.
Paratë dyshohet se janë transferuar duke përdorur sistemin bankar nëntokësor hawala, i cili nuk regjistron asnjë transaksion monetar fizik.
Autoritetet filluan hetimet në fillim të vitit 2021, pasi autoritetet spanjolle kapën 200 kilogramë kokainë dhe 500 mijë euro para të gatshme, të cilat u gjetën të fshehura në ndarjet sekrete të disa automjeteve.
Dy persona të tjerë u arrestuan gjithashtu në Spanjë dhe një në Mbretërinë e Bashkuar, ndërsa 11 prona u kontrolluan, tha Europol në një deklaratë. Njëri nga të dyshuarit drejtonte një dyqan makinash që dyshohet se ofronte automjete për organizatat kriminale.
“I dyshuari kryesor dhe bashkëpunëtorët e tij ishin përgjegjës për mbledhjen e sasive të mëdha të parave të gatshme nga organizatat kriminale, të cilat më pas do t’ua ‘dorëzonin’ organizatave të tjera kriminale në vende të tjera”, tha agjencia.
Një burim i afërt me hetimin i tha AFP se i dyshuari kryesor ishte 62-vjeçari, John Francis Morrissey. Europol nuk e ka konfirmuar identitetin e tij.
“I dyshuari kryesor u konsiderua një objektiv me vlerë të lartë nga Europol, për përfshirjen e tij në një numër çështjesh kriminale të profilit të lartë në të gjithë Evropën”.
Hetimi 18-mujor u drejtua nga Guardia Civil e Spanjës, së bashku me Agjencinë Kombëtare të Krimit të Mbretërisë së Bashkuar, Policinë holandeze dhe Garda irlandeze.