Të mërkurën e 17 majit, Policia e Kosovës ka arrestuar një person, pasi dyshohet për posedim të dy armëve të zjarrit.
Në një komunikatë për media, Policia e Kosovës ka njoftuar se ndaj të dyshuarit do të ngrihet kallëzim penal.
“Ne Prizren, nga ana e zyrtarëve policor patrullues është ndalur për kontroll në komunikacion automjeti VË Golf-4 me targa regjistrimi të shtetit bullgar. Nën ulësen e ngasësit të këtij automjeti – te dyshuarit V.S.( 28 vjeçar) janë hasur 20 copë fishekë të kalibrit 7.62mm të cilat më pas janë sekuestruar nga ana e krim teknikut në cilësinë e dëshmisë materiale. Rastit, në vendngjarje i përgjigjen edhe hetuesit policor nga të cilët ndermirën masat e duhura”, thuhet në komunikatë.
I dyshuari, pas arrestimit të tij shoqërohet në polici për intervistim, dhe i njëjti gjatë deklarimit pranon se posedon dy armë të zjarrit, të cilat i mban në shtëpinë e tij pa leje adekuate nga organet kompetente.
“Nga ana e hetueseve policor, te dyshuarit V.S. në shtëpinë e tij i janë gjetur dhe më pas janë sekuestruar dy pushkë automatike të modelit AK-47 dhe dy karikatorë”.
Për rastin në fjalë është konsultuar Prokurori i Shtetit, me vendim të të cilit armët e gjetura janë sekuestruar.
“Me vendim të prokurorit iniciohet rasti i klasifikuar si vepër penale “Mbajtje në pronësi, kontroll ose posedim i pa autorizuar i armëve”. Me aktvendim me shkrim te Prokurorit ,te dyshuarit V.S. i shqiptohet masa e ndalimit për 48 ore dhe kundër te njëjtit ngritët kallëzim penal”, vijon komunikata.
