Prokuroria Speciale e Kosovës ka njoftuar se është arrestuar një person i dyshuar për spiunazh në regjionin e Mitrovicës.
Sipas njoftimit, arrestimi i të dyshuarit A.V. ka ndodhur të mërkurën mbrëma pas hetimeve disamujore nëpërmjet Agjencisë së Kosovës për Inteligjencë (AKI) dhe Policisë së Kosovës.
“Prokuroria Speciale e Republikës së Kosovës, pas zhvillimit të hetimeve disa mujore në bashkëpunim me Agjencinë e Kosovës për Inteligjencë dhe Policinë e Kosovës – Drejtorinë Kundër Terrorizmit sot në mbrëmje, në regjionin e Mitrovicës ka arrestuar një person. I arrestuari A.V. dyshohet për kryerjen e veprës penale “Spiunazhi”, nga neni 124 të KPRK-së”, thuhet në njoftim.
I dyshuari, me inicialet A.V., me aktvendim të Prokurorit të Shtetit nga Prokuroria Speciale është ndaluar për 48 orë.
Ndërkaq, për momentin nga Policia e Kosovës janë duke u kryer bastisje në banesën e të dyshuarit.
Kujtojmë se më 5 qershor, në Ferizaj janë arrestuar Bedri Shabani e Muharrem Qerimi për spiunazh me BIA-n serbe.
Bedri Shabani ka qenë zyrtarë doganorë deri në vitin 2004, ndërkohë Muharrem Qerimi ka qenë zyrtar policor deri në vitin 2008.
Dy të dyshuarit tashmë janë në paraburgim për një muaj.