Policia e Kosovës ka njoftuar se një person me inicialet L.H nga Prishtina është arrestuar nga Njësiti Kundër Kontrabandës në Doganën e Kosovës për posedim të kokainës.
“Policia e Kosovës, respektivisht njësitë nga Policia Kufitare, Njësia K9 dhe Njësia Antikontrabandë nga Dogana e Kosovës në kuadër të implementimit të planit të përbashkët operacional " EU4FOCAL-ACTION DAYS" pas kryerjes së procedurave për regjistrimin e personit L.H (1987) nga Prishtina në automjetin e tij me targa vendore, është selektuar për kontroll në vijën e dytë”, ka njoftuar Policia.
Po ashtu, siç ka njoftuar Policia, pas përzgjedhjes për kontroll më të detajuar, gjatë kontrollit në veturën e të dyshuarit të lartpërmendur, është gjetur një substancë narkotike e llojit kokainë, si dhe është bërë kontrolli trupor i të dyshuarit. Me ç’rast në trupin e tij është gjetur një sasi e vogël e së njëjtës lëndë, e cila pasi është peshuar së bashku duke rezultuar në total 101.82 gram.
“Lidhur me rastin është njoftuar njësia për Hetimin e Trafikimit me Narkotik në Prizren dhe Forenzikës të cilët pasi kanë dal në vendin e ngjarjes, me ç’rast nga i dyshuari janë sekuestruar si prova materiale dëshmitë si në vijim:
– Një (1) qese plastike me substancë të dyshuar narkotike të llojit kokainë me peshë 101 gram,
– Një (1) qese plastike me substancë të dyshuar narkotike të llojit kokainë me peshë 0.82 gram,
– Një (1) telefon mobil,
– Vetura me targa vendore”.
Pas njoftimit të prokurorit të shtetit, janë pranuar udhëzime për bastisje në shtëpinë e të dyshuarit, me ç’rast gjatë bastisjes janë gjetur dhe konfiskuar tre peshore digjitale dhe tri pako me telefona celularë.
I dyshuari është ndaluar për 48 orë. Ndaj tij është iniciuar rasti “blerja, posedimi, shpërndarja dhe shitja e paautorizuar e narkotikëve, substancave psikotrope dhe analoge”.