Barcelona ka konfirmuar zyrtarisht transferimin e talentit spanjoll, Pablo Borre, i cili vjen nga klubi i futbollit, Racing Santander.
Klubi katalunas ka fituar garën me rivalët e Real Madridit për transferimin e talentit 19-vjeçar Pablo Torre.
Torre, të mërkurën gjatë ditës ka finalizuar marrëveshjen për t’u bërë lojtar i ri i Barcelonës. Ai ka nënshkruar një kontratë katërvjeçare dhe fillimisht do të luajë me ekipin B.
Nga njoftimi i klubit, Pablo Torre ka jetuar ditën e tij të parë si lojtar i Barçës të mërkurën, në të cilën lojtari ka nënshkruar kontratën e tij dhe, gjithashtu, ka veshur fanellën e Barçës në Camp Nou për herë të parë.
“Pablo Torre ka nënshkruar kontratë deri më 30 qershor 2026, me një klauzolë përfundimi prej 100 milionë euro”, thuhet në njoftimin e Barcelonës.
𝐏𝐀𝐁𝐋𝐎 𝐓𝐎𝐑𝐑𝐄 𝟐𝟎𝟐𝟔 💙❤️ pic.twitter.com/bJEREEDCKs
— FC Barcelona B (@FCBarcelonaB) June 15, 2022
Në ceremoninë e nënshkrimit morën pjesë presidenti Joan Laporta, zëvendëspresidenti i sportit Rafael Yuste, drejtori i Futbollit Mateu Alemany, presidenti i Barça B Jordi Casals, menaxheri përgjegjës për futbollin Joan Soler dhe drejtori Jose Ramon Alexanko.
I pranishëm ka qenë edhe përfaqësuesi i Pablo Torres, Arturo Canales dhe disa anëtarë të familjes së tij, mes tyre edhe prindërit, të cilët nuk kanë dashur të humbasin këtë ditë të veçantë.
Ndryshe, Torre bëri debutimin e tij me ekipin e parë të Racing më 18 tetor 2020 në ndeshjen e ligës kundër Portugaletes. Vitin e fundit ai ka luajtur 34 ndeshje dhe ka qenë një lojtar kyç në promovimin e Racing de Santander në Kategorinë e Dytë.
Ai ka shënuar 10 gola këtë sezon dhe ka shpërndarë 11 asistime ndërmjet ligës dhe play-off-it.