Bashkimi Evropian ka theksuar se po monitoron hetimin për sulmin e fundit ndaj Postës së Kosovës në komunën e Zveçanit, i cili ndodhi natën e kaluar.
Bashkimi Evropian në një përgjigje për Dukagjinin ka dënuar fuqishëm përdorimin e dhunës dhe ka theksuar rëndësinë e adresimit të çështjes së shërbimeve postare brenda dialogut të lehtësuar nga BE-ja.
“Ne e dënojmë fuqishëm përdorimin e dhunës të tillë dhe ritheksojmë rëndësinë e adresimit të dorëzimit të shërbimeve postare brenda Dialogut të lehtësuar nga BE-ja, sipas marrëveshjeve për Telekomunikacionet të arritura në vitin 2013 dhe Planit të Veprimit të miratuar në vitin 2015”, thuhet në përgjigjen e BE-së.
Po ashtu, BE-ja ka rikujtuar se pret përpjekje të qëndrueshme për de-përshkallëzim të situatës në veri të Kosovës, duke theksuar se çdo veprim njëanshëm, provokues dhe retorikë ndarëse duhet të shmanget për të parandaluar tensionet dhe dhunën.