Presidenti i Shqipërisë, Bajram Begaj pas takimit me homologune tij austriak, Van der Bellen ka thënë se ka kënaqësinë që të vlerësojë lidhjet ekonomike mes Shqipërisë dhe Austrisë.
“Investimet e para të rëndësishme austriake në Shqipëri u realizuan me sukses në një kohë kur pakkush investonte tek vendi ynë, si edhe në sektorë që në atë kohë praktikisht nuk ekzistonin”, ka shkruar Begaj.
Ai ka thënë se është besimplotë se bashkëpunimi ekonomiko-tregtar midis Shqipërisë dhe Austrisë “ka potencial të madh që do të zhvillohet në vijim në interes të të dy vendeve”.
Begaj ka vlerësuar përfshirjen e kompanive, sipërmarrjeve austriake me investime serioze dhe shumë domethënëse në të gjithë sektorët e rëndësishëm strategjikë, si në fushën energjetike ashtu edhe në atë infrastrukturore.
“Konstatoj me shumë kënaqësi se vitet e fundit ka rritje në flukset hyrëse të investimeve të drejtpërdrejta të kapitalit austriak në Shqipëri. Na gëzon fakti se kompanitë austriake kanë gjetur tek kompanitë shqiptare partnerë të besueshëm për zhvillimin e projekteve të tyre në vendin tonë”, ka theksuar presidenti shqiptar.