Presidenti i Shqipërisë, Bajram Begaj, ka bërë të ditur se është në komunikim të vazhdueshëm me strukturat e sigurisë, Shtabin e Përgjithshëm të Forcave të Armatosura, strukturat e shërbimeve informative dhe ato ligjzbatuese, që rasti i mbrëmshëm në Gramsh të Shqipërisë të zbardhet sa më shpejt.
Dy ushtarë shqiptarë të cilët ishin caktuar me detyrë për ruajtjen e Uzinës së Përpunimit të Armëve në Gramsh, kanë mbetur të plagosur mbrëmjen e së shtunës pasi janë përplasur fizikisht me tre shtetas rusë, të dyshuar si agjentë. Mes ushtarëve shqiptarë dhe rusëve ka ndodhur një përleshje fizike, ku njëri prej tyre, shtetas rus, ka përdorur sprej dhe ka lënë të lënduar ushtarët shqiptarë.
“Mirënjohje për dy efektivët e Forcave të Armatosura, të cilëve u uroj shërim të shpejtë”, ka shkruar Begaj gjersa ka inkurajuar njësitë përkatëse në zbulimin e mëtejshëm të sulmit.
Për rastin në fjalë ka reaguar edhe Kryeministri i Shqipërisë, Edi Rama.
Ramën e ka bërë krenar fakti që “rojet ushtarake i neutralizuan tre individët e dyshuar për spiunazh”.
Çfarë trishtimi që edhe kur bëhet fjalë për një ngjarje kaq delikate sa ajo e Gramshit, gjithëfarë gjelash laramanë ia marrin avazit majë plehut të interesave të tyre mizerabël! Po edhe çfarë krenarie për rojet ushtarake që i neutralizuan tre individët e dyshuar për spiunazh!
— Edi Rama (@ediramaal) August 20, 2022
Është bërë e ditur se ushtarët të cilët ishin me detyrë në Uzinën e Përpunimit të Armëve në Gramsh, janë në gjendje të mirë shëndetësore.