Doktoresha kujdestare në repartin e Emergjencës në Qendrën Klinike Universitare të Kosovës(QKUK), Dafina Basholli, ka bërë të ditur për RTV Dukagjinin se i plagosuri gjatë aksionit të Policisë në Vranjevc vazhdon të jetë në sallën e operimit.
“Rreth orës 09:00 është sjellë këtu një person i plagosur. Personi në fjalë vazhdon të jetë në sallën e operimit, ndërsa tani për tani gjendja e të lënduarit është stabile, ndonëse është sjellë me lëndime të rënda”, ka thënë Basholli.
Sipas njoftimit të Policisë, të shtunën në Vranjevc të Prishtinës, ka pasur të shtëna me armë zjarri.
Pas hetimeve të kryera, të dielën policia ka kryer një bastisje në lokacionin e dyshuar.
Pas bastisjes së shtëpisë së të dyshuarit, i njëjti, ka drejtuar armën në drejtim të zyrtarëve policorë.
![](https://www.portalid.com/wp-content/uploads/2022/05/278353103_1049993455914423_2866787967293579802_n.jpg)
“Me të arritur në lokacionin-shtëpinë e banimit të personit të dyshuar, policia ka hasur në personin e dyshuar, i cili papritmas ka drejtuar armën në drejtim të zyrtarëve policorë duke ua rrezikuar jetën e tyre”, thuhet në njoftimin e Policisë.
Policia ka njoftuar se falë shkathtësive dhe veprimeve të shpejta të zyrtarit policor, i njëjti, në vetëmbrojtje ka përdorur armën ndaj personit të dyshuar me qëllim të neutralizimit të rrezikut për jetën e tij dhe kolegëve të tjerë.
Portali D do t’ju mbajë të informuar për detaje të tjera në lidhje me rastin.