Një rast tragjik ka ndodhur të hënën e dy janarit në rrugën nacionale Leposaviq – Mitrovicë, ku si pasojë e një aksidenti trafiku një person e ka humbur jetën.
Policia ka njoftuar se deri te aksidenti ka ardhur si pasojë e mospërshtatjes së shpejtësisë dhe kushteve jo të përshtatshme atmosferike apo mjegullës.
Shoferi, të cilin policia ende nuk e ka identifikuar, e kishte humbur kontrollin duke përfunduar në lumin Ibër.
Me të marrë lajmin, në vendin e ngjarjes kanë dalë njësitet policore të Kosovës të cilët gjatë natës nuk kanë arritur ta gjejnë.
Trupi dhe vetura e të ndjerit janë gjetur tek në mëngjes, kur edhe është konstatuar se drejtuesi i makinës ka ndërruar jetë.
“Në rrugën nacionale Leposaviq-Mitrovicë, ka ndodhur një aksident trafiku në të cilën është përfshirë një veturë, e cila derisa ishte në lëvizje (drejtuesi i panjohur) dyshohet për shkak të mospërshtatjes së shpejtësisë dhe kushteve atmosferike-mjegullës, ka humbur kontrollin dhe ka përfunduar në lumin Ibër. Në vendin e ngjarjes kanë dalë njësitet policore dhe zjarrfikësit, në kërkim të drejtuesit dhe veturës të cilët gjatë natës nuk kanë arritur ta gjejnë. Kërkimi ka vazhduar në orët e hershme të mëngjesit, ku është gjetur dhe nxjerrë automjeti së bashku me vozitësin i cili ishte pa shenja jete. Lidhur me rastin është informuar edhe prokurori kompetent për të vazhduar me procedurat e mëtejme”, thuhet në njoftimin e policisë.