Zëvendëskryeministri i parë i Kosovës për integrim evropian, zhvillim dhe dialog, Besnik Bislimi dhe ambasadori jo-rezident i Irlandës për Kosovë, Ronan Gargan, të mërkurën në takimin e tyre, kanë diskutuar për rritjen e bashkëpunimit ekonomiko-kulturor dhe forcimin e marrëdhënieve bilaterale ndërmjet Irlandës dhe Kosovës.
Sipas njoftimit të Zyrës së Kryeministrit, në këtë takim është thënë se potenciali i Kosovës në fushën e teknologjisë informatike mund të shihet si mundësi për rritje të bashkëpunimit ekonomik dhe ndëraktivitetit mes dy vendeve.
Bislimi ka vlerësuar se është e rëndësishme mbështetja nga Republika e Irlandës në procesin e liberalizimit të vizave, anëtarësimit në Këshillin e Evropës dhe organizata të tjera ndërkombëtare për Republikën e Kosovës.
Më tutje, thuhet se në këtë takim është biseduar edhe për rëndësinë e stabilitetit politik dhe ekonomik në Ballkanin Perëndimor dhe integrimit të rajonit në Bashkimin Evropian.
Të dyja palët theksuan domosdoshmërinë e forcimit të marrëdhënieve bilaterale mes dy shteteve dhe mundësinë e një perspektive të bashkëpunimit kulturor në përafrimin e popujve me njëri-tjetrin.
