Zëvendëskryeministri, Besnik Bislimi, është takuar me përfaqësues të Odës Ekonomike të Maqedonisë Veri-Perëndimore, të hënën e 20 shkurtit.
Gjatë këtij takimi është diskutuar mbi mundësitë e koordinimit dhe shtyrjes përpara të projekteve të përbashkëta, të cilat ndërtojnë ura solide të bashkëpunimit.
“Përfaqësuesit e OEMVP theksuan mbështetjen e tyre ndaj Qeverisë së Republikës së Kosovës, ku dhe shtuan se e shohin Procesin e Berlinit si mekanizëm të duhur të mbrojtjes dhe të produkteve të tyre”, shkroi ai në Facebook.
Po ashtu, në takim është diskutuar edhe mbi mënyrat në të cilat mund të punohet bashkërisht, edhe për të lehtësuar problematikat me të cilat po përballen bizneset shqiptare atje si, resurset njerëzore, kuadrot e reja, fuqia punëtore dhe tregu i punës.
Prandaj Bislimi thotë se është e rëndësishme ruajtja e tregut, eliminimi i barrierave burokratike dhe forcimi i lidhjes ekonomike.
“Që nga Qeveria Kurti I, kemi ndarë 10 mijë euro për rindërtimin e shkollës së djegur në Dajac-Rozhajë, kemi ndarë 500 mijë euro për Luginën e Preshevës si mbështetje financiare për përballimin e gjendjes së krijuar nga pandemia, e deri te 2 milionë eurot e ndara nga buxheti si mbështetje për Luginën gjatë vitit 2022”, shtoi ai.
Ai ka theksuar se puna do të vijojë në intensifikimin e bashkëpunimit, ku ka sinjale pozitive, marrë parasysh dhe rritjen e eksportit dhe importit gjatë vitit të kaluar mes dy vendeve.
Ndërtimi i rrugëve dhe zonave të përbashkëta industriale e ekonomike mbeten prioritare, me qëllim thellimin e bashkëpunimit dhe përafrimit mes dy vendeve, potencon Bislimi.