Pamjet e publikuara nga ngjarja e ndodhur të mërkurën e 2 nëntorit, në Shtëpinë e pleqve në Pejë, ka tronditur vendin. Keqtrajtimi i të moshuarës nga infermierja e këtij institucioni, ka bërë që të reagojnë qytetarë dhe figura publike.
Një prej tyre është edhe gazetari Blendi Fevziu, i cili përmes një postimi në rrjetin social Facebook, ka thënë që infermieret kanë prekur në besimin e një kombi të tërë që respektin për të moshuarit e kanë pasur në thelb të filozofisë së tij.
“Sot ato dy vajza kanë goditur mbi ëndrrën e mijëra dëshmorëve të Kosovës, për të ndërtuar një shoqëri më të mirë, pa dhunën me të cilët serbët kërcenonin shqiptarët. Ato vajza kanë goditur mbi besimin e një kombi të tërë që respektin ndaj të moshuarve e ka pasur në thelb të filozofisë së tij. Sot, ato nuk kanë goditur një nënë pa djalin e saj. Sot ato kanë goditur secilin nga ne, ndaj secili prej nesh duhet të ndjejë në fytyrë ato goditje dhe atë turp…”, ka shkruar Fevziu.
Më tej, ka thënë se rasti i ndodhur ka qenë dhimbja e përbashkët e të gjithë shqiptarëve, ndërsa ka shtuar se ajo është edhe nënë dëshmori.
“Kjo nënë kishte një djalë. Ajo do të ishte sot me të, e me siguri, do kishte qenë e kënaqur dhe e lumtur me nipat e mbesat në shtëpinë e tij. Por djali nuk e lumturoi dot. Në momentin më të rëndësishëm e më delikat të vendit të tij, Taulant Nuraj vendosi t’i bashkohet UÇK-së. Ai vendosi të mbrojë me jetën e tij, jo vetëm të moshuarit, por edhe gjithë qytetarët e Kosovës që kërcënoheshin nga dhuna serbe. Ai ra dëshmor në afërsi të Gjakovës në vitin 1999”, ka vijuar ai.
Ndër të tjera, ka thënë që vendi për të cilin djali i saj e filjoi jetën, i rezervoi asaj një skenë e cila të rrënqethë.
Në lidhje me këtë ngjarje ka reaguar edhe moderatorja Rudina Xhunga e cila ka thënë që ky rast tregon mungesën e mundësive për të mbijetuar dhe kjo ndodhi është dëshpëruese.
“Shqipëria e 30 vjetëve, Kosova e këtyre viteve, është e shkatërruar nga varfëria, nga kërkimi i identitetit. Të rinjtë janë në kërkim të vetes nëpër botë dhe prindërit i kanë lënë pas. Një prej arsyeve nuk është mungesa e dashurisë, por mungesa e mundësive për të mbijetuar. Por sot të gjithë kudo, në Tiranë, Prishtinë, në Pejë ku ndodhi ngjarja e tmerrshme, po flasin për këto vajza qelbësira”.
“U mundova të mos prekem, sepse dua të flas, jo të shpreh emocionet e mia, për këtë ngjarje kaq dëshpëruese. Sepse të rënda ngjarje kemi parë plot, por kjo është dëshpëruese. Ky është reagim ndaj një të pambrojture, dy herë e pambrojtur”, ka thënë ajo.
Ndërsa ka theksuar se këta njerëz nuk e meritojnë të vdesin azileve dhe me kushte skandaloze.