Ish-kryetarja e Gjykatës Kushtetuese, Greta Caka, ka reaguar ndaj sulmeve dhe linçimeve që, sipas saj, ka marrë nga eksponentë të Lëvizjes Vetëvendosje, duke mohuar se ka diskutuar për ndonjë post politik.
Reagimi i saj vjen pas një debati publik ku emri i saj u përmend për një pozitë në një qeveri të mundshme, gjë që, sipas saj, ka nxitur një fushatë agresive dezinformatash me motive politike.
Në një postim në Facebook, Caka ka theksuar se nuk ka dashur të merret më parë me këtë çështje, pasi një mënyrë e tillë komunikimi nuk meriton përgjigje.
“Nuk kam reaguar asnjëherë ndaj sulmeve, shpifjeve dhe linçimit që fatkeqësisht e karakterizojnë diskursin tonë publik. Vlerësoj që një nivel dhe mënyrë e tillë e padenjë e komunikimit, nuk meriton të legjitimohet me përgjigje.
Përjashtimisht dhe marrë parasysh që një bisedë në të cilën është përmendur edhe emri im, pa dijeninë dhe rrjedhimisht, pa miratimin tim, ka mjaftuar për të filluar një fushatë agresive dezinformatash bazuar në kauza të motivuara politikisht, përfshirë kundër institucioneve të Republikës, konsideroj që është i nevojshëm një sqarim i shkurtër dhe i prerë.
Nuk kam diskutuar me asnjë person e as parti politike rreth asnjë funksioni publik e politik, si dhe nuk kam asnjë interesim për diskutime të tilla. Do të mbetem gjithnjë krenare që i kam shërbyer një institucioni me kontribut të jashtëzakonshëm në mbrojtjen e rendit kushtetues dhe vlerave të demokracisë në Republikën e Kosovës. Ndërsa, ashtu siç jam deklaruar gjithnjë, brenda fushëveprimit të profesionit tim, do të vazhdoj të punoj me përkushtim për forcimin e shtetit të së drejtës në Republikën e Kosovës, duke e mbrojtur edhe integritetin e funksionit që kam ushtruar në Gjykatën Kushtetuese”, ka shkruar Caka në Facebook.
Në fund, Caka ka paralajmëruar se çdo çështje e mëtejshme do të trajtohet përmes mekanizmave ligjorë.