Hajrullah Çeku, Ministri i Kulturës, Rinisë dhe Sportit, përmes një postimi në Twitter ka treguar se 1 mijë e 247 artefakte nga Kosova po mbahen ilegalisht në Beograd.
“1247 artefakte të koleksionit të muzeut publik janë marrë nga Muzeu Kombëtar i Kosovës gjatë kohës së luftës (1998-99) nga Akademia serbe e Shkencave. Kjo ishte pjesë e projektit gjenocidal të Serbisë kundër historisë/identitetit të shqiptarëve, krahas shkatërrimit të mbi 1 mijë objekteve të trashëgimisë”, ka shkruar Çeku.
“Pothuajse 24 vjet më pas, koleksioni ende mbahet padrejtësisht dhe ilegalisht në muzetë e Beogradit. Sipas marrëveshjes origjinale (Libri i Kthimit), artefaktet janë marrë për ekspozim të përkohshëm, por ende nuk janë kthyer në Muzeun Kombëtar të Kosovës, atij të cili i takojnë”.
Çeku ka shtuar se Serbia po shkel haptazi marrëveshjen origjinale të vitit 1998/99 të nënshkruar ndërmjet institucioneve përkatëse të Kosovës dhe Serbisë, Konventën e vitit 1970 e UNESCO-s për kthimin e pasurisë kulturore në vendin e origjinës dhe dokumentin e Ahtisaarit që përcakton një afat kohor për kthimin e koleksionit.