Gypi të cilin Kremlini e mbylli në fillim të këtij muaji për një periudhë të pacaktuar kohe në shenjë hakmarrjeje për sanksionet perëndimore, ka shkaktuar rrjedhje në Nord Stream.
Ndërkaq, paralajmërimet erdhën menjëherë pasi u zbulua një rrjedhje e veçantë gazi në një tubacion të dytë Nord Stream 2, një projekt shumë i diskutueshëm që ishte ngrirë nga qeveria gjermane disa ditë përpara pushtimit rus të Ukrainës dhe nuk u bë kurrë funksional.
Asnjë nga tubacionet nuk po transporton gaz aktualisht në Evropë, megjithëse një nivel i caktuar furnizimesh mbetet brenda infrastrukturës.
Shkaku i rrjedhjeve nuk ishte menjëherë i qartë. Një hetim është duke u zhvilluar.
“Dëmi që ka ndodhur në një ditë njëkohësisht në tri linja të tubacioneve në det të hapur të sistemit Nord Stream është i paprecedentë,” ka thënë Nord Stream AG, konsorciumi përgjegjës për tubacionet, shkruan euronews.
“Është e pamundur të vlerësohet afati kohor për rimëkëmbjen e infrastrukturës së transportit të gazit deri më tani”, ka shtuar ai.
Rrjedhja e parë, përmes Nord Stream 2, u zbulua të hënën në mbrëmje në seksionin danez të gazsjellësit të Detit Baltik, rreth ishullit Bornholm, pas një “rënie të madhe presioni”.
Autoriteti Detar Danez lëshoi një paralajmërim lundrimi dhe krijoi një zonë ndaluese brenda pesë miljeve detare (rreth 9 km) nga vendi, duke konsideruar se rrjedhja mund të përbëjë rrezik për trafikun detar.
Qeveria gjermane ra në kontakt me autoritetet daneze për të zbuluar arsyet e kësaj çështjeje.
Disa orë më vonë, dy rrjedhje u identifikuan në Nord Stream 1, një në zonën ekonomike daneze dhe një tjetër në zonën ekonomike suedeze të Detit Baltik.
Thyerja e tubacioneve të gazit është jashtëzakonisht e rrallë, dhe për këtë arsye ne shohim arsye për të rritur nivelin e gatishmërisë si rezultat i incidenteve që kemi parë gjatë 24 orëve të fundit, tha Kristoffer Bötzauw, drejtor i Agjencisë Daneze të Energjisë.
Agjencia vuri në dukje se meqenëse asnjë prej tubacioneve nuk transportonte gaz në Danimarkë, siguria e furnizimit të vendit nuk ishte në rrezik. Megjithatë, gazi i rrjedhur mund të sjellë pasoja sigurie dhe shëndetësore për udhëtarët dhe gjithashtu të ndizet mbi ujë dhe në ajër, duke shkaktuar shpërthime.
Suedia reagoi në një mënyrë të ngjashme dhe lëshoi një paralajmërim lundrimi, duke u kërkuar anijeve të mbanin një “distanca të sigurt” nga rrezja e pesë miljeve detare.
Administrata Detare Suedeze gjithashtu dërgoi një paralajmërim për avionët, duke vendosur një lartësi sigurie prej 1000 metrash mbi zonat në fjalë.
Nord Steam 1 ka kapacitetin për të transportuar deri në 170 milionë metra kub gaz në ditë (ose 55 miliardë metra kub në vit). Rusia është akuzuar për manipulim të flukseve pasi u godit nga sanksionet e BE-së pas luftës në Ukrainë. Flukset arritën në 20% të kapacitetit total gjatë verës përpara se tubacioni të mbyllej plotësisht.
Nord Steam 2 duhej të dyfishonte këtë kapacitet në 110 miliardë metra kub vjetor.
Klaus Müller, presidenti i rregullatorit të rrjetit gjerman, ka thënë në Twitter se ngjarjet nënvizuan vlerësimin e rregullatorit se situata është “e tensionuar”, por ka shtuar se BE-ja nuk ishte më e varur nga tubacionet.
Zëdhënësi i Kremlinit Dmitry Peskov e quajti lajmin “shumë shqetësues” dhe tha se asnjë opsion nuk duhet “të përjashtohet tani”, duke përfshirë sabotimin.