Shtetet e Bashkuara të Amerikës kanë ripërsëritur qëndrimin se dialogu në mes të Kosovës dhe Serbisë duhet të përfundojë me njohje reciproke.
Presidentja e Kosovës, Vjosa Osmani, dhe kryeministri Albin Kurti, të martën e 26 korrikut janë pritur në Departamentin amerikan të Shtetit nga Sekretari, Antony Blinken.
Gjatë këtij takimi është theksuar partneriteti midis ShBA-së dhe Kosovës, me ç’rast Blinken edhe ka njoftuar se të mërkurën e 27 korrikut do të nënshkruhet kontrata me korporatën për energji.
Liderët e vendit do të marrin pjesë në ceremoninë e organizuar në Kongresin amerikan për nënshkrimin e marrëveshjes me Korporatën e Sfidave të Mijëvjeçarit, për Programin Kompakt të Kosovës.
Po ashtu, Blinken ka falënderuar Kosovën për mbështetjen e saj ndaj Ukrainës dhe për pritjen e refugjatëve afganë.
“Ata diskutuan për rëndësinë e dialogut të lehtësuar nga Bashkimi Evropian për normalizimin e raporteve në mes të Kosovës dhe Serbisë, me njohjen reciproke në qendër, në rrugën përpara drejt integrimit euro-atlantik”, thuhet në njoftimin e DASh-it.
Ndërkaq, Blinken nëpërmjet një postimi në llogarinë e tij në Twitter ka thënë se ShBA-ja mbështet integrimin euroatlantik dhe ndërkombëtar të Kosovës dhe dialogun Kosovë-Serbi të lehtësuar nga BE.
Met today with President Osmani and Prime Minister Kurti of Kosovo. The United States supports Kosovo’s Euro-Atlantic and international integration and the EU-facilitated Kosovo-Serbia Dialogue. We appreciate Kosovo’s hospitality to Afghans and its firm support for Ukraine. pic.twitter.com/cNIrY2EwwY
— Secretary Antony Blinken (@SecBlinken) July 26, 2022
Ndërkaq, presidentja e Kosovës, Vjosa Osmani në takimin me Sekretarin Blinken, ka thënë se Kosova është mirënjohëse gjithmonë ndaj ShBA-së, sepse ajo ia ka shpëtuar jetën qytetarëve të Kosovës.