Situata në veri të Kosovës është diskutuar edhe në takimin në mes të ministres së Punëve të Jashtme, Donika Gërvalla dhe homologut të saj grek, Nikos Dendias.
Ministri grek në një konferencë për media tha se është e rëndësishme që në mes të Kosovës dhe Serbisë të zbatohen marrëveshjet që janë arritur deri më tani dhe të mos ketë përshkallëzim të situatës.
“Siç kemi biseduar, e mbështesim diskutimin Beograd-Prishtinë dhe marrëveshjet ligjërisht të detyrueshme”, ka deklaruar Dendias duke theksuar se duhet të zbatohen marrëveshjet nga të dy palët.
Ndër të tjera, ai ka thënë se kjo vizitë e tij në Ballkanin Perëndimor nënvizon rëndësinë që Greqia ka për rajonin.
“Sot biseduam edhe për nivelin bilateral, si mund ta zgjerojmë bashkëpunimin në shumë fusha”, ka vijuar ai.
Sipas tij, BE-ja është destinacioni i preferuar për të gjithë Ballkanin Perëndimor dhe se duhet të jetë pika përfundimtare për të gjithë.
Ndryshe, ministri i Punëve të Jashtme të Greqisë, Nikos Dendias të martën e 20 dhjetorit është pritur në takim nga homologia e tij nga Kosova, Donika Gërvalla.
Të hënën, Dendias, ka nisur një vizitë në vendet e Ballkanit Perëndimor.
Në kuadër të kësaj vizite, Dendias ka zhvilluar një bisedë me emisarin e BE-së për dialogun Kosovë-Serbi, Miroslav Lajçak.
Dendias ka thënë se gjatë kësaj bisede kanë diskutuar për përpjekjet e ndërmarra për uljen e tensioneve në veri të Kosovës.