Dëshminë e tij para trupit gjykues, e ka vazhduar edhe eksperti mjeko-ligjor, Naim Haliti, i cili ka treguar për raportin e autopsisë që i është bërë së ndjerës, Marigona Osmani.
Sipas këtij raporti, viktima ka pasur më shumë se 12 thyerje në trup.
Haliti gjatë dëshmisë së tij ka elaboruar gjetjet e raportit, ku ka thënë se vdekja e së ndjerës ka qenë e dhunshme dhe ka ardhur si pasojë e politraumës, që nënkuptojnë lëndime të shumta të shkaktuara në trupin e viktimës.
“Në kuadër të të gjeturave, vdekja e së ndjerës ka ardhur si pasojë e shokut hemorragjik, asfiksisë mekanike, të cilat kanë ardhur si pasojë e gjakderdhjes së jashtme dhe të brendshme, si dhe kundërmimit të rrugëve të sipërme të frymëmarrjes nga dëmtimet që kanë qenë në atë zonë, ku dëmtimet janë të përshkruara në detaje në raportin e autopsisë”, ka thënë ai gjatë dëshmisë së tij, duke treguar se viktima ka pasur të thyer edhe brinjët dhe se në trupin e së ndjerës është gjetur një masë e drogës e llojit kanabis.
Edhe specialisti i emergjencës në Ferizaj, Burim Maloku në dëshminë e tij para trupit gjykues në procesin gjyqësor ndaj Dardan Krivaqës dhe Arbër Sejdiut, të akuzuar për vrasjen e 18-vjeçares, ka treguar se e ndjera Marigona Osmani, ka ardhur në emergjencën e spitalit të Ferizajt, pa shenja jete dhe është vërejtur se vdekja ka ndodhur më herët e jo në ato çaste që e kanë sjellë.
Ai ka treguar se kur kishte dalë të kërkonte personat që e kishin sjellë në spital, nuk i kishte parë dhe më pas e kishin njoftuar edhe policinë e mjekun ligjor.
“E ndjera është sjellë nga dy persona, është sjellë pa shenja jetë, ne kemi filluar procedurën terapinë edhe ekipi është mbledhur me shpejtësi…e kemi vërejtur se është pa shenja jete dhe ka lënë përshtypjen se kjo ka ndodhur më përpara dhe se nuk ka qenë e çasteve të fundit” ka thënë ai.
Ndërkaq, seanca ndaj dy të akuzuarve është shtyer në kohë të pacaktuar. Kryetari i trupit gjykues ka thënë se seanca e radhës do caktohet, sapo të sigurohet prania e një dëshmitari.
Dëshmon specialisti i Emergjencës në Ferizaj: Kur u soll Marigona Osmani ishte pa shenja jete
Vazhdon procesi gjyqësor ndaj Dardan Krivaqës dhe Arbër Sejdiut