Ministri i Punëve të Brendshme, Xhelal Sveçla, ka thënë se secili individ i cili ka qenë pjesë e sulmeve ndaj forcave të KFOR-it dhe qytetarëve në komunat në veri të vendit, do të sillet para drejtësisë.
Policia e Kosovës ka bërë të ditur të premten se është arrestuar një serb, i cili dyshohet se e kishte sulmuar KFOR-in gjatë protestave të dhunshme në veri të Kosovës. Ministri Sveçla ka bërë të ditur se bëhet fjalë për Nenad Orloviq.
Ai ka theksuar se secili do të japë llogari për secilin krim.
“Policia e Kosovës sot ka arrestuar Nenad Orlovic, i njohur me nofkat “Nemac” dhe “Rusi”, i cili dyshohet për sulm ndaj KFOR-it në ditën e 29 majit në Zveçan ku mbeten të plagosur shumë ushtarë. Pandëshkueshmëria dhe amnistia ndër vite e kriminelëve të tillë, ka rezultuar me sulme brutale ndaj KFOR-it nga të cilat mbi 30 pjesëtarë mbetën të lënduar. Secili që ka organizuar dhe ka qenë pjesë e atyre sulmeve do të sillet para drejtësisë. Republika nuk trembet. Secili do të japë llogari për secilin krim. Do të vazhdojmë pa u ndalur, në luftë ndaj të gjitha bandave që kanë për synim terrorin ndaj qytetarëve tanë e destabilizimin e vendit tone”, ka shkruar ai.
Me anë të një postimi në Facebook, ministri Sveçla ka përmendur sulmin ndaj dy të rinjve shqiptarë, gjersa ka theksuar se organet janë të angazhuara që sulmuesit të sillen sa më parë para drejtësisë.
“Bandat kriminale në veri të vendit tonë ndër vite kanë ushtruar terror mbi qytetarët tanë përmes akteve të tyre të ndryshme kriminale. Qytetarët tanë, veçanërisht ata shqiptarë, janë dëbuar nga shtëpitë e tyre, ata që kanë qëndruar janë rrahur, maltretuar e terrorizuar në vazhdimësi nga këto grupe kriminale. Shumë prej tyre janë larguar nga aty pikërisht për shkak të këtij terrori të ushtruar sistematikisht nga struktura kriminale me urdhër nga Beogradi. Akte të njejta kanë ndodhur edhe ndaj qytetarëve të etnisë serbe të cilët kanë njohur dhe kanë bashkëpunuar me institucionet tona. Mbrëmë, 15 deri në 20 persona kanë rrahur dy të rinj shqiptarë. Ky akt, si çdo tjetër është i papranueshëm dhe organet tona janë të angazhuara që sulmuesit të sillen sa më parë para drejtësisë”, ka shkruar Sveçla.
Sipas njoftimit të Policisë së Kosovës, i dyshuari, N.O banon në Mitrovicën e Veriut, dhe njihet me nofkën “Nemac” apo “Rusi”.
“Si rezultat i punës dhe hetimeve intensive të realizuara nga Policia e Kosovës, sot në orët e paradites është arrestuar i dyshuari mashkull serb N. O., me vendbanim në Mitrovicë Veri, i njohur me nofkat “Nemac” dhe “Rusi”, si i dyshuar për përfshirje në rast të sulmit dhe rrezikimit të personave nën mbrojtje ndërkombëtare – KFOR-it”, thuhet në njoftim.
Arrestimi i tij, sipas policisë, është bërë pasi janë siguruar dëshmitë e mjaftueshme në përfshirje në sulm ndaj KFOR-it më datën 29 maj të këtij viti.
Tensionet në veriun e Kosovës filluan më 26 maj, me rastin kur Policia e Kosovës ndihmoi kryetarët e komunave në Zveçan, Zubin Potok dhe Leposaviq të vendosen në objektet komunale pas protestave të banorëve lokalë.
Tensionet kulmuan më 29 maj, kur serbët lokalë u përleshën me ushtarët e misionit të KFOR-it, me ç’rast mbetën të lënduar dhjetëra persona.
Nga protestat në veri të vendit janë sulmuar edhe gazetarët. Përpos se fizikisht, mjetet e tyre profesionale dhe të udhëtimit janë dëmtuar disa herë.