Kanë kaluar gati dy javë prej rrëfimit të një prindi nga Vitia, të cilit i është dhunuar vajza 13 vjecare.
Por për rastin e rëndë, nga i cili viktima është 8 muajshe shtatzënë, ky prind identitetin e të cilit e mbron televizioni, ka ende për të thënë.
Por përpara se ti shprehet Televizionit, ai iu ka drejtuar hetuesit policor me të cilin kanë bashkëpunuar fillimisht, por që i njëjti nuk duket të ketë pasur gatishmëri për të vazhduar komunikimin.
“Kisha informacion shtesë me i dhanë hetuesit, e thirra në telefon, ai ma kishte blloku numrin, e provova 4-5 herë e pashë që diqka nuk është në rregull, më kishte blloku numrin, e thirra me numër të vajzës brenda minutit ai numër e hapi”, ka thënë babai i viktimës.
Por, i njëjti që nuk i përgjigjet babait të viktimës së dhunimit seksual, i përgjigjet televizionit duke i thënë shkurt se për çkado duhet drejtuar tek zyra për media.
Babai i viktimës bën të ditur se, që nga raportimi i Televizionit për rastin, presioni nga familja e të dyshuarit është shtuar.
Një herë motra e pastaj babai i të dyshuarit i janë drejtuar shtëpisë së viktimës.
“Ajo është deklaruar që jam motra e tij, edhe me një fjalë i ka bërë presion vajzës time, se i ka thënë a e kë fëmijën me të apo jo, a je e virgjër apo jo, na ka shqetësu. Mbas këtij rastit ka qenë babai i djalit bashkë me vajzën, kanë ardhë te dera, qysh u sjellke muhabeti me e bë një marrëveshje si mes tyre, ose me pare, unë nuk jamë aj njeri, nuk e shes moralin me pare, unë pres drejtësinë “, ka thënë babai i viktimës.
Por, jo vetëm familjarët gjithashtu babai pohon që edhe i dyshuari ka tentuar të kontaktojë tashmë me viktimën.
“Vajza ska pasë më kontakt, ai ka tentu me kontaktu me vajzën, tash a ka qenë ai, a familja e tij, ne e kemi incizimin që ka deshtë me kontaktu”, ka shtuar babai i viktimës.
Ani pse asnjë psikolog nuk e ka vizituar vajzën, babai thotë se në shtëpinë e tyre ka ardhur një puntor i qendrës sociale, i cili i ka ofruar viktimës dy opsione.
“Kur të lind fëmija kish mundësi me lënë tek qendra, 2 vite me qëndru fëmija, ndërsa vajza me pa, me kontaktu me fëmijën e vet, e pas dy vitesh po u kthejke fëmija te vajza, opsioni i dytë ishte pasi të merrë kjo fëmijën pas dy vite, me lejen tonë të prindërve mund kjo të kthehet te ai person”, ka shtuar babai i viktimës.
Por, opsioni i dytë e ka fyer shumë këtë të fundit.
“Me shku vajza të ai person unë nuk jam dakord, sot as kurrë hiç se kjo nuk u bë me qef por me dhunë, vajza është 13 vjeçe”, ka thënë tutje ai.
Televizioni ka qenë tek Qendra për Punë Sociale por drejtori i saj Demush Mehmeti nuk ka qenë aty, ndërsa komunikimi me të është bërë përmes telefonit me c’rast ka thënë se kanë vepruar konform kërkesave të familjes në ofrimin e ndihmës.
Por as ai e as Drejtoresha e Shëndetësisë në Viti, Merrushe Ahmeti nuk kanë dashur të flasin para kamerës, ku kjo e fundit ka edhe një arsyetim të çuditshëm.
“Nuk ka nevojë për kamera zojë, na jena Komunë e vogël e mundemi me pas problem me opinionin kështu që jau japim informacionet”, ka thënë drejtoresha e Shëndetësisë në Viti, Merrushe Ahmeti.
Në gjithë këtë situatë ku i dyshuari është jashtë shtetit, babai i viktimës ka shtuar se nuk po trajtohet me prioritet nga Prokuroria.
Por Kryeprokurori i Gjilanit Arben Kadriu ka mohuar një gjë të tillë, duke thënë se po bashkëpunohet ngusht me shtetin e huaj, dhe shprehet optimist se i dyshuari do të kapet.