“Strukturat kriminale të orkestruara nga regjimi në Beograd asesi nuk po mund ta pranojnë që rendi e ligji të funksionojë në veri të Kosovës”. Kështu ka thënë gazetari në Beograd, Radomir Dimiq, teksa ka reaguar për sulmin me dy granata ndaj Postës së Kosovës në Zveçan.
Pas parasysh edhe sulmin terrorist në Banjska të Zveçanit ku mbeti i vrarë rreshteri i Afrim Bunjaku, Dimiq tha se ndërkombëtarët nuk kanë pse të hezitojnë që përgjegjësit t’i kërkojë nga Qeveria e Beogradit.
Mes tjerash Dimiq tha se sulmet, sikur ajo e së martës te njësia postare ndjellin frikë edhe te serbët lokal.
“Pra janë kundër interesave të popullsisë lokale, kundër integrimit dhe bashkëjetesës së tyre me fqinjët shqiptar. Institucionet e shtetit të Kosovës duhet të angazhohen edhe më me përkushtim për zbulimin e aktorëve të këtyre akteve kriminale dhe terroriste, të vazhdojnë më guxim në zbatimin e plotë të ligjit dhe kushtetutës, duke ju bërë të ditur bandave kriminale se ditët i kanë të numëruara dhe nuk do të ju lejohet për asnjë çmim destabilizimi i situatës dhe frikësimi i popullatës me akte të tilla”, u shpreh ai.
Ndryshe, Kryeministri në detyrë i Kosovës, Albin Kurti, dhe kryetari i Komunës së Zveçanit dhe ambasadori i Gjermanisë kanë dënuar sulmin në Postën e Kosovës në Zveçan, ku pak pas mesnatës më 1 prill u hodhën dy granata dore.
Kurti e quajti sulmin “orvatje për të cenuar sigurinë dhe për të penguar integrimin e qytetarëve në sistemin ligjor dhe institucional të Republikës së Kosovës”.
“Brengosëse në këtë situatë mbetet fakti se individë të njohur për lidhjet e tyre me grupe kriminale dhe terroriste, si Millan Radoiçiq, vazhdojnë të mbeten të lirë, e po strehohen dhe po shfrytëzohen nga pushteti në Serbi për qëllime shoviniste”, shkroi Kurti në Facebook.
Në shtator të vitit të kaluar, Prokuroria Speciale e Kosovës ngriti aktakuzë ndaj 45 personave – në mesin e tyre edhe Millan Radoiçiq – për sulmin e armatosur ndaj Policisë së Kosovës në Banjskë më 24 shtator të vitit 2023, kur kishte mbetur i vrarë rreshteri Afrim Bunjaku.
Autoritetet në Serbi nuk pranojnë ta ekstradojnë Radoiçiqin në Kosovë dhe thonë se ai do të gjykohet nga “gjykatat serbe”, ndërsa zyrtarët në Kosovë thonë se ato i kanë ofruar mbrojtje atij.
Më herët gjatë ditës, Policia e Kosovës konfirmoi se një granatë dore kishte shpërthyer brenda objektit të Postës së Kosovës në Zveçan pak pas mesnatës të martën, teksa tha se një tjetër “e kemi shpërthyer ne në mënyrë të kontrolluar”.
Edhe kryetari i Komunës të Zveçanit, Ilir Peci, e dënoi këtë sulm, për të cilin akuzoi një “grup terrorist” pa ia përmendur emrin.
“Unë besoj që vazhdimisht kanë ndodhur [sulme] prej të njëjtit grup”, tha Peci, duke folur për media.
Peci shtoi se, megjithë sulmet e tilla, Komuna e Zveçanit është e sigurt sepse “Policia e Kosovës është gjithmonë aktive”.
Në një postim në Facebook, Policia e Kosovës tha se një ose disa persona të panjohur kanë hedhur granata dore dhe se njësia anti-terror është duke “punuar intensivisht për të zbuluar autorët e këtij shpërthimi”.
Për rastin është njoftuar Prokuroria e Shtetit, që është udhëzuar ta inicojë rastin si “shkaktim i rrezikut të përgjithshëm”.
Ambasadori i Gjermanisë në Kosovë, Jorn Rohde, përmes një postimi në rrjetet sociale e cilësoi si “akt të papranueshëm dhune” sulmin me granatë dore në Zveçan.
“Ofrimi i sigurisë dhe mirëqenies për të gjitha komunitetet në Kosovë është vital, keqbërësit duhet të përballen me drejtësinë. Ky incident vë në pah nevojën për përparim në dialogun e lehtësuar nga Bashkimi Evropian”, shkroi Rohde.