Presidentja e Kosovës, Vjosa Osmani, kryeministri Albin Kurti dhe kryeparlamentari Glauk Konjufca kanë bërë homazhe përkujtimore në nderim të ushtarëve të rënë të NATO-s.
Pikërisht sot është edhe përvjetori i 24-të i çlirimit të Kosovës, datë e cila shënon edhe ndërhyrjen e NATO-s për ta ndalur spastrimin etnik të shqiptarëve të Kosovës nga regjimi i Millosheviqit.
Me këtë rast, kryeministri Kurti tha se sakrifica e dëshmorëve dhe ndërhyrja e NATO-s e ndalën gjenocidin e Serbisë mbi popullin e Kosovës.
Ai e përmendi sakrificën e familjes Jashari, veprimtarinë e Adem Demaqit dhe të të gjithë atyre që kanë kontribuuar për lirinë e vendit.
“Pas çlirimit vjen paqja, sot përkujtojmë dhe festojmë 24-vjetorin e çlirimit të Kosovës dhe vendosjen e paqes në vendin tonë, pra 12 qershorin. Bashkë me presidenten e Republikës dhe kryetarin e Kuvendit kujtuam duke vendosur lule të freskta dhe bërë homazhe humanizmin e Rugovës, qëndresën e Demaqit, sakrificën e Jasharajve dhe këtu kontributin e NATO-s. Përulemi para gjithë dëshmorëve dhe martirëve të kombit dhe të gjithë atyre të cilët dhanë jetën për lirin e popullit dhe çlirimin e Kosovës. Ndërhyrja ushtarëve të NATO-s e ndaloi gjenocidin e Serbisë mbi popullin tonë gjithnjë dhe përgjithmonë jemi falënderues dhe mirënjohës”, tha ai.
Sipas presidentes, ushtarët e NATO-s ia kanë dhënë vulën çlirimit të Kosovës. Ajo përmendi edhe ish-presidentin Rugova, si dhe familjen Jashari dhe të gjithë dëshmorët e kombit.
“Sot shënojmë përvjetorin e një prej ditëve më të rëndësishme në historinë e kombit tonë, në historinë e Republikës së Kosovës, ditën kur shtetin ynë u çlirua pas një lufte, e cila rezultoi me gjenocid ndaj një populli të pafajshëm të Republikës së Kosovës. Tani po nderojmë ushtarët e NATO-s, ata që nga 10 qershori e tutje hyn në Republikën e Kosovës për t’ia dhënë vulën çlirimit të vendit tonë. Jemi mirënjohës përherë dhe përsërisim këtë mirënjohje në emër të gjithë qytetarëve të Kosovës, për vizionarët e shtetit, për presidentin Rugova, gjithë aktivistët që dhanë gjithçka që të vendosin këto themele, për komandantin legjendar, Adem Jashari dhe gjithë ushtarët e UÇK-së që dhanë jetën e tyre për lirinë tonë, por edhe mirënjohje përjetshme për gjithë miqtë tanë, të cilët na ndihmuan që lirinë, pavarësinë dhe demokracinë ta kemi realitet, të cilin sot e gëzojnë gjithë qytetarët e Kosovës”, tha Osmani.
Çlirimi i Kosovës, sipas Konjufcës, erdhi me shumë sakrifica dhe me një kauzë të drejtë, siç është ajo e lirisë.
Ai tha se 12 qershori është njëra nga ditët më të çmueshme e të rëndësishme të popullit të Kosovës.
“Sot, pra është 24-vjetori i çlirimit të Kosovës nga Serbia, çlirimi i Kosovës është shembulli më i spikatur i bashkëveprimit të suksesshëm mes faktorit vendor edhe bashkësisë ndërkombëtare. Për ne ishte dita e ardhjes së lirisë një datë shumë e çmuar për popullin e Kosovës, por ishte po ashtu edhe sukses i madh në planin ndërkombëtar. Sepse dita e çlirimit të Kosovës koincidoi pikërisht edhe me ndalje e gjenocidit të Serbisë ndaj popullit të Kosovës. Kjo natyrisht nuk do të mund të arrihej edhe pa miqtë tanë të çmuar ndërkombëtarë, pa shtete, të cilat e ndihmuan çlirim e Kosovës. Por, kjo ndodhi edhe pikërisht për arsye se kauza jonë ishte shumë e drejt”.
“Në krejt cka po kërkonim si popull dhe qytetarë ishte që ta hiqnim pushtimin, okupimin serb shekullor në Kosovë. Për këtë ditë dhamë edhe shumë, dhamë dëshmorët tanë, i dhamë martirët e Kosovës dhe kishte shumë sakrifica dhe mund të popullit tonë për çlirim, prandaj ata do të kujtohen dhe nderohen gjithmonë sepse janë në themelin e lirisë së shtetit tonë. Prandaj, unë e shfrytëzoj rastin që të uroj edhe një herë ditën të gjithë qytetarëve të Kosovës 12 qershorin, ditën e çlirimit, sepse është njëra nga ditët më të çmueshme, më të rëndësishme të popullit tonë”, tha ai.