Në të gjithë vendin janë organizuar aktivitete të shumta për të shënuar Ditën e Tokës, nga institucionet qendrore, lokale dhe nga organizatat që merren me mjedisin.
Në Prishtinë, Ministria e Mjedisit, Planifikimit Hapësinor dhe Infrastrukturës organizon aktivitetin kryesor me disa organizata të mjedisit në sheshin “Zahir Pajaziti”. 30 vajza e djem nga shkollat publike do të mbjellin kopshte vertikale nga ora 10:00.
Komuna e Prishtines do të organizojë aktivitete në lagjen ‘Dardania”, ndërsa “Shkolla e Gjelbër” do të vendosë shporta për mbeturina.
Dita e Tokës u shënua për herë të parë në vitin 1970, kur një senator i Shteteve të Bashkuara nga “Wisconsin” organizoi demostrim kombëtar për të rritur ndërgjegjësimin rreth cështjeve të mjedisit. U zhvilluan takime në të gjithë vendin dhe deri në fund të vitit, Shtetet e Bashkuara krijuan Agjencinë për Mbrojtje të Mjedisit. Deri në vitin 1990, Dita e Tokës ishte ditë që festohej nga më shumë se 140 vende të botës, përcjellë “NationalGeograficKids”.
Sipas “NationalGeograficKids”, disa nga format që mund ta mbrojnë mjedisin janë:
Të bëheni luftëtar i mbeturinave
Përpara se të hidhni diçka, mendoni nëse mund të riciklohet apo ripërdoret. Ju, gjithashtu, mund të kufizoni mbeturinat, duke e zvogëluar sasinë e gjërave që blini. Për shembull, kontrolloni bibliotekën për librin që duhet të lexoni, përpara se të vizitoni dyqanin.
Të mbjelleni pemë
Studiuesit vlerësojnë se rreth 15 miliardë pemë priten çdo vit, prandaj nevoja për të mbjellë pemë është e madhe. Në varësi të vendit ku mbillen pemët, hija e tyre madje mund të zvogëlojë edhe nevojën për ajër të kondicionuar në muajt më të nxehtë.
Të përcjellni mesazhin
Flisni me shoqërinë dhe familjen për mbrojtjen e mjedisit dhe kërkoni ndihmë prej tyre, bashkohuni dhe rilidhuni me natyrën.