Dy nga katër serbët e arrestuar në Gjakovë e kanë pranuar edhe vetë se punojnë në institucione të sigurisë në Serbi.
Në seancën përgatitore për caktimin e masës së sigurisë të mbajtur këtë të hënë, Pavle Kragoviq ka thënë se punon si inspektor i Policisë në Kragujevc të Serbisë.
Ndërsa Milovan Steviq deklaroi është doktor, stomatolog, në akademinë ushtarake të mjekësisë në Beograd.
Branko Rakiq tha se është teknik i komunikacionit dhe Nemanja Vamoviq deklaroi se është inxhinier i pylltarisë.
Prokuroria tha se masa e paraburgimit ndaj të dyshuarve është e duhura.
“Janë gjetur mjete të mprehta te cekura me lartë te pandehurit i kanë mbajtur gjate vizitës në mënyre të organizuar në disa nga manastiret ortodokse në Kosovë…”, deklaroi Venera Shala – Prokurore
Por këtë masë e kundërshtuan të dyshuarit përmes avokatëve mbrojtës, derisa aty u përmendet edhe reagimi i ministrit të Brendshëm në detyrë, Xhelal Sveçla.
“As nuk ka bazë, as fare hiç as për vendimin e fillimit te procedurës penale, e aq më pak për caktimin e paraburgimit…”, deklaroi Hasan Hoti – Avokat.
“Këtu nuk ka fare vepër penale dhe nuk flasim për dyshimin e bazuar mirëpo, për shkak të një sakice të vogël, një sharre të vogël, e një thike të vogël. I kemi 15 kamera këtu edhe i shihni sigurimin. Kemi deklaratën e ministrit si të mos shkojnë këta njerëz në paraburgim duhet të gjendet diçka. Do të gjejnë diçka”, Predrag Milkoviq – Avokat.
Njëri nga të dyshuarit tha se vjen çdo vit në Kosovë në ketë periudhë për shkak të festave ortodokse.
“Une jam gati çdo vjet ne kohen e njëjtë këtu. Nëse jam shendosh do të jem edhe në vitin tjetër”, tha Millovan Steviq – I dyshuar
Këtë grup prej katër personash që po udhëtonin me veturë me targa të Kragujevcit, e kanë ndalur zyrtarët policorë për tejkalim të kufizimit të shpejtësisë.
Sheremet Elezaj- Zëdhënës i Policisë në Gjakovë ka deklaruar se “Kanë ndaluar një veturë me targa të Serbisë në Gjakovë. Pas kontrollimit të veturës janë gjetur tri armë të ftohta, dy thika e një sopatë. Në stacionin policor janë shoqëruar 4 persona që kanë qenë në automjet”.
Disa nga të dyshuarit ofruan edhe dorëzani për tu mbrojtur në liri, ndërkohë që gjykata u vazhdoi masën e ndalimit derisa të nxjerrë vendim mbi masën e sigurisë.
Të katër të arrestuarit ishin duke udhëtuar në drejtim të Prizrenit nga Gjakova.
Kurse nga rasti në Prizren, 2 persona gjenden në ndalim, kurse 10 të tjerë janë intervistuar në cilësinë e dëshmitarëve.