Zyrtarë të Policisë së Kosovës, po qëndrojnë jashtë e brenda hapësirave të Qendrës Klinike Universitare të Kosovës.
Kjo për shkak se aty është duke marr trajtim një person që është i ndaluar për grabitjen që ndodhi një ditë më parë në afërsi të një qendre tregtare në Prishtinë.
Edhe i dyshuari për grabitje e edhe viktima që ishte duke siguruar një furgon që po transportonte para vazhdojnë të jenë në gjendje të rëndë shëndetësore.
“..në orët e mbrëmjes është sjellë edhe një tjetër po ashtu i lënduar me armë zjarri dhe po ashtu pas ekzaminimeve dhe trajtimit kirurgjik në sallën emergjente, është sjellë për trajtim të mjekimit intensiv gjendja e përgjithshme e të dy pacientëve vazhdon të qëndrojë edhe më tutje jo stabile me nevojë te madhe për përkrahje nga aparatura mjekësore, vazhdon të jenë të monitoruar dhe marrin trajtimin e më tutjeshëm jemi në fazën ku jemi duke tentuar të bëjmë stabilizimin e gjendjes së tyre.. Lëndimet janë serioze realisht që te të dy pacientëve lëndime më të mëdha ka marr pacienti i dytë intervenimi i të cilit ka zgjatur më tepër”, ka theksuar Shaqir Uka – Shef i Mjekimit Intensiv Qendror.
Detaje për rastin kanë dhënë nga policia e Kosovës, në raportin 24 orësh ku kanë treguar se në grabitje kanë qenë të përfshirë katër persona, tre nga të cilët ende nuk janë identifikuar, e gjithashtu në vendngjarje janë sekuestruar një armë zjarri me një karikator dhe pesë fishekë.
“GRABITJE E ARMATOSUR – Prishtinë 17.03.2025-10:26. Është raportuar për një rast grabitje në parkingun e një qendre tregtare, ku katër persona të dyshuar kanë shtënë me armë zjarri në drejtim të tre viktimave meshkuj kosovarë punëtorë të kompanisë për bartjen e parave. Si pasojë e të shtënave nga arma e zjarrit lëndime trupore kanë pësuar njëri nga viktimat i cili është dërguar për tretman mjekësor në QKUK Prishtinë, si dhe një i dyshuar. Të dyshuarit tjerë kanë ikur me një veturë në drejtim të panjohur. Në vendin e ngjarjes janë gjetur dhe sekuestruar një armë e zjarrit me një karikator dhe pesë fishekë. I dyshuari është arrestuar dhe është dërguar në QKUK për tretman mjekësor”, thuhet nga Policia.
Për 25 vjecarin e arrestuar që është duke qëndruar në QKUK, Prokuroria do të parashtrojë kërkesë për caktimin e masës së paraburgimit.
“Lidhur me pyetjen tuaj ju informojmë, se Prokurori i çështjes në fjalë brenda afatit ligjor do të parashtron kërkesën për caktimin e masës së paraburgimit ndaj personit të dyshuar. Për më shumë informacione ju njoftojmë në fazat mëtutjeshme.”
Ndonëse ngjarjen policia e prokuroria e cilësoi si grabitje e armatosur, që cak kishte kompaninë transportuese të parave, İstanbul Ozel Guvenlik, Genc Berisha një zyrtar i lartë i kësaj kompanie në Kosovë, ka ngritur dyshime se ngjarja nuk ka të bëjë me grabitje.
“Tani për tani, sipas pamjeve në kamerat e sigurisë rreth 4 persona të pajisur me uniforma dhe me armë ushtarake AK 47, kanë sulmuar në prit pjesëtarët e sigurisë të kompanisë tonë në detyrë, me ç’rast të njëjtit janë përgjigjur me armë dhe si pasojë ka mbetur i lënduar njëri nga pjesëtarët e ekipit tonë, edhe 1 grabitës i nacionalitetit serb nga veriu, deri tani e konfirmuar! Meqenëse nuk kemi humbje materiale në aspektin e parave gjatë këtij sulmi, dhe bazuar në veprimet e sulmuesve, dyshoj dhe kam arsye të forta të besoj, se ky sulm më së paku ka pasur cak pjesëtarët e kompanisë sonë në vend ngjarje”, ka deklaruar ai.
Megjithatë, pas interesimit të televizionit për këtë version gjatë ditës së sotme, ai e ka fshirë postimin dhe nuk është përgjigjur. Për mundësinë e zgjerimit të hetimeve nuk kanë folur as nga Prokuroria Themelore në Prishtinë.