Dy persona kanë vdekur si pasojë e një aksidenti të rëndë që ndodhi mbrëmjen e së hënës në autostradën “Ibrahim Rugova.”
Lajmin e ka konfirmuar ushtruesi i detyrës së kryeprokurorit të Prizrenit, Petrit Kryeziu, i cili deklaroi se dy viktimat kanë humbur jetën në vendin e ngjarjes. Përveç viktimave, disa persona të tjerë kanë mbetur të lënduar.
“Mund ta konfirmoj se dy persona kanë vdekur në vendin e ngjarjes në aksidentin në të cilin u përfshinë një kamion dhe dy vetura”, ka thënë Kryeziu për mediat.
Siç ka konfirmuar më herët zëdhënësi i Policisë së Kosovës, Daut Hoxha, aksidenti është regjistruar në segmentin e autostradës që lidh Prizrenin Verior me atë Jugor, në kilometrin 13.
“Me datë 21.10.2024 rreth orës 18:40 ne autostradën “Dr. Ibrahim Rugova,, Prizren Veri-Prizren Jug; km-13 eshte shkaktuar nje aksident trafiku me fatalitet ku jane te përfshira: Nje automjet me targa te huaja, nje kamion dhe nje automjet me targa vendore.
Ne vendin e aksidentit kane dal njesitet relevante policore dhe ekipe tjera. Policia eshte duke ndermarr veprimet e nevojsheme hetimore lidhur me shkaktaret e ketij aksidenti te rendë.
Per detaje tjera do te njoftoheni nga kompetentet pas raportimeve shtese.
Humbjet e jetëve njerëzore si pasoje e aksidenteve rrugore janë tepër shqetësuese për te gjithë, andaj Policia e Kosovës kërkon nga të gjithë pjesëmarrësit në trafik, në veçanti shoferet që të kenë kujdes më të shtuar, të respektojnë rregullat dhe shenjat e trafikut rrugor si dhe t’iu përshtaten kushteve të rrugës, për të pasur një siguri më të madhe në trafik dhe për te shmangur rastet e tilla tragjike”, ka njoftuar Hoxha.