Nënkryetarja e Prishtinës nga radhët e PDK-së, Donjeta Sahatçiu, ka bërë të ditur se PDK-së po i bashkohet një asambleiste nga radhët e Lëvizjes Vetëvendosje, Berna Saraçi.
Nënkryetarja Sahatçiu lajmëroi që prej së mërkurës, ekipi i PDK-së në Prishtinë përfaqësohet edhe me një supergrua në Kuvendin Komunal.
“Berna Saraçi do të vazhdojë të shërbejë si këshilltare komunale për të nxitur punë edhe më të mirë në Kryeqytet”, ka shkruar Sahatçiu në Facebook.
“Ndihem jashtëzakonisht e plotësuar të shoh se si vizioni “Prishtina na bashkon” po jetësohet natyrshëm e me vullnet çdo ditë e më shumë. Prishtina na bëri bashkë në qeverisje fillimisht për projekte konkrete në arsim, shërbime publike, zhvillim rural, kulturë e sport, por që më pas u zgjerua në një frymë që veçse po lulëzon. Bashkë, pa fjalë shumë, me punë e përkushtim të sinqertë – ashtu sikurse edhe e kishim dëshiruar nga fillimi” ka vijuar ajo.