Ministria e Kulturës, Rinisë dhe Sportit nuk do të lëshojë vërtetime nga Ligji për Sponsorizim për Federatën e Futbollit të Kosovës.
Kjo për shkak se FFK nuk i ka respektuar afatet kohore të MKRS-së për harmonizimin e akteve të saj normative me Ligjin për Sportin.
Këtë kërkesë, MKRS-ja ia ka drejtuar të gjitha federatave sportive më datën 03.09.2024.
Përveç se nuk do të mund të lëshohen vërtetime për sponsorizime, FFK nuk do të mund të përfitojë as mjete financiare nga MKRS nga procesi i kategorizimit dhe mbështetje të tjera institucionale.
Sipas asaj që ka mësuar TV Dukagjini, harmonizimi i akteve normative të federatave me Ligjin Nr. 08/L-277 për Sportin është një nga kriteret bazike të marrjes dhe mbajtjes së licencës për ushtrimin ekskluziv të të drejtës së organizimit të garave zyrtare në një sport të caktuar nga një federatë e caktuar.
MKRS i ka bërë thirrje FFK-së dhe federatave të tjera sportive të përfundojnë këtë proces brenda afateve kohore, sepse në të kundërtën përgjegjësia për pezullimin e sistemit të financimit të sportit/federatës do të jetë mbi ata.
Deri më tani, vetëm Federata e Basketbollit, Hendbollit, Karatesë, Notit, Pingpongut dhe Triathlonit e kanë përmbushur këtë obligim.