Sekretari i Përgjithshëm i Federatës së Mundjes të Kosovës, Genc Fazlija, ka thënë se ekipi e ka pranuar me qetësi gjendjen e krijuar pas tërmetit në Turqi.
“Jemi grumbulluar të gjithë në hollin e hotelit ku ishim të vendosur, dhe duke i shfrytëzuar shkallët emergjente të hotelit, kemi dalë jashtë e i kemi shpëtuar të gjithë pa asnjë lëndim”, ka thënë Fazlija në emisionin “Debat Plus” në RTV Dukagjini.
Tutje, Fazlija ka thënë se kur kanë dalë jashtë objektit ku ishin duke qëndruar, ishin të rrëzuara banesat 15-20 katëshe.
“Kemi dëgjuar shumë njerëz duke kërkuar ndihmë dhe ne me atë shpirtin human të shqiptarëve, iu kemi ofruar ndihmë dhe fare s’kemi hezituar”, ka shtuar Fazlija.
Ndër të tjera, ai ka treguar se për katër orë rresht kanë ndihmuar që t’i nxjerrin njerëzit që ishin nën rrënoja.
“Ka qenë një gjendje tmerruese, ka pasur familjarë që nuk kanë mundur ta gjejnë njëri-tjetrin. Në disa momente ka qenë e pafuqishme t’i ndihmojë djali nënës ose babai fëmijës”, ka shtuar Fazlija.
Mes tjerash, Fazlija potencoi se kjo ngjarje ishte shokuese, duke shtuar se ky tërmet kishte shkatërruar shumëçka.