Federata e Futbollit të Kosovës i është drejtuar UEFA-s për të denoncuar incidentet e fyerjeve ndaj Kosovës në dy ndeshje të Ligës së Kombeve: Çeki – Shqipëri dhe Serbi – Zvicër.
Nga ndeshja në Pragë, e cila u zhvillua të premten, dhe ajo në Leskovc të shtunën, u dëgjuan thirrje si “Kosova është Serbi” dhe shfaqjen e flamurit serb mbi hartën e Kosovës nga tifozë huliganë.
Në reagimin e saj, FFK thekson se këto akte janë të papranueshme dhe në kundërshtim me vlerat që përfaqëson UEFA.
“Këto akte të papranueshme, e të cilat po ndodhin në vazhdimësi nga tifozë serbë dhe tifozë të disa vendeve tjera që janë të afërta me grupet e tilla serbe, nuk kanë vend në futboll dhe në asnjë arenë sportive, pasi përhapin urrejtje dhe përçarje mes popujsh e shtetesh. Rikujtojmë se incidentet e tilla janë në kundërshtim të plotë me vlerat që UEFA dhe komuniteti ndërkombëtar i futbollit përfaqësojnë. Futbolli duhet të shërbejë si platformë e fuqishme për promovimin e paqes, bashkëjetesës dhe vlerave të barazisë kudo”, thuhet në reagimin e FFK-së.
FFK ka përgatitur një ankesë zyrtare për të kërkuar masa të menjëhershme ndaj federatave çeke dhe serbe për këto incidente.
“FFK, si anëtare e barabartë me federatat e shteteve tjera, ka përgatitur ankesën zyrtare për në UEFA, me dëshmitë e të gjitha shkeljeve e ofendimeve që u bën ndaj shtetit të Kosovës, duke kërkuar që të ndërmerren masa të menjëhershme për të dënuar në mënyrë sa më të ashpër skenat e tilla dhe për të parandaluar përsëritjen e tyre në të ardhmen”, thuhe tutje në reagim.
Përveç thirrjeve ofenduese, ndeshja në Pragë pa flamuj shqiptar të kthyer përmbys dhe fishkëllima ndaj Granit Xhakës gjatë himnit të Zvicrës.