“Nuk kam patur kurrfarë qëllimi kundër asnjë zyrtari, por jam kujdesur për t’i respektuar procedurat ligjore”.
Kështu ka deklaruar Enver Hajrullahu, njëri nga protagonistët e audio-incizimeve të publikuara nga gazeta “Nacionale”, ku përfshihet MINT-i.
Përmes një postimi në Facebook, ai ka thënë se këto audio-incizime nuk kanë rrjedhur nga ai, ndonëse janë bërë në hapësirat e MINT-it.
Ai ka thënë se kjo bisedë ka ndodhur gati në fund të korrikut të vitit të kaluar.
“Të nderuar qytetar, miq, kolegë dhe familjarë, Sot, është publikuar një video në mediumin Nacionale.com, si protagonist i asaj video jam Unë. Dua t’iu njoftoj se këto audio-incizime nuk kanë rrjedhur nga Unë, dhe i njëjti është bërë në hapësirat e MINT përkatësisht në njërën nga zyrat e Departamentit të Financave, duke mos qenë në dijeni që po ndodh një incizim i tillë, dhe Unë nuk jam burim i mediumit në fjalë. Kjo bisedë ka ndodhur përafërsisht në fund të korrikut të vitit 2022. Me përgjegjësinë më të lartë morale dhe profesionale deklaroj se nuk kam patur kurrfarë qëllimi kundër asnjë zyrtari, por jam kujdesur për t’i respektuar procedurat ligjore”, ka shkruar Hajrullahu.
Ndryshe, disa incizime të publikuara nga gazeta “Nacionale” ditë më parë, ku përfshihet MINT-i, kanë nxitur reagime në opinion.
Sipas këtij mediumi, zyrtarë të Ministrisë së Industrisë, Ndërmarrësisë dhe Tregtisë bisedojnë lidhur me nënshkrimin e një kontrate për rezervat shtetërore.