Ministri i Mbrojtjes i Kosovës, Armend Mehaj, gjatë takimit me homologen e tij nga Maqedonia e Veriut, Slavjanka Petrovska, ka shprehur gatishmërinë e Forcave të Sigurisë së Kosovës për ofrimin e trajnimeve në fushën e kërkim-shpëtimit për ushtrinë maqedonase.
Kështu ka bërë të ditur Mehaj në një postim në llogarinë e tij në Facebook, ku ka theksuar se në këtë takim është diskutuar për fushat në të cilat mund të bashkëpunojnë, me theks të veçantë në trajnime, ushtrime të përbashkëta ndërmjet dy ushtrive.
“Aktualisht, FSK është e gatshme që ushtrisë maqedonase t’i ofrojë trajnime në fushën e kërkim-shpëtimit, për të cilën ushtarët tanë janë jashtëzakonisht të përgatitur, ndërsa pala maqedonase do të shkëmbejë me ne përvojën e reformimit të brendshëm përgjatë rrugëtimit në procesin për anëtarësim në programin e Partneritetit për Paqe, në të cilin synojmë dhe ne të jemi anëtar”, ka shkruar Mehaj.
Po ashtu, në një fushë tjetër në të cilën ai thotë se janë marrë vesh të bashkëpunojnë është integrimi i grave në ushtri.
Pos kësaj, pjesë e diskutimeve ishte edhe shkëmbimi i praktikave më të suksesshme, shkollimi i oficereve dhe trajnimi i tyre.
Ndryshe, Mehaj të dielën e 23 tetorit ka njoftuar se Qendra Ndërkombëtare e Trajnimit në Kërkim-Shpëtim është duke vazhduar me përgatitjen dhe certifikimin e kuadrove të reja të specializuara në fushën e kërkim-shpëtimit.
Mehaj ka thënë se 13 specialistë të rinj i janë shtuar radhëve të tyre, pas përfundimit të suksesshëm të Kursit të Avancuar.