Në vazhdën e reagimeve të shumta nga pozita e opozita dhe ambasadorë të ndryshëm që erdhën pas diskutimit të organizuar nga Ambasada e ShBA-së për Asociacionin, ka folur edhe ministrja e Punëve të Jashtme dhe Diasporës (MPJD), Donika Gërvalla, e cila ka thënë se “Kosova ofron kornizën më të avancuar të të drejtave të pakicave në Evropë”.
Duke folur për Asociacionin e komunave me shumicë serbe, Gërvalla ka thënë se çdo model që e lejon Serbinë ta minojë pavarësinë e Kosovës duhet të refuzohet.
“Çdo model që lejon Serbinë të minojë sovranitetin e Kosovës duhet të refuzohet nga të gjithë ata që synojnë paqen e qëndrueshme dhe marrëdhëniet e fqinjësisë së mirë në rajon”, ka shkruar Gërvalla.
Diskutimi i së martës në Ambasadën e ShBA-së për Asociacionin ishte i mbyllur. Aty morën pjesë zyrtarë shtetëror nga pozita e opozita, pjesëtarë të shoqërisë civile e të tjerë.