Ministrja e Punëve të Jashtme dhe e Diasporës, Donika Gërvalla, ka thënë se e drejta e mërgatës për të votuar, si e drejtë themelore demokratike, buron nga Kushtetuta e Republikës së Kosovës, ndërsa mënyra e votimit rregullohet me Ligjin e ri Zgjedhor, të miratuar gjatë këtij mandati qeverisës nga Kuvendi i Kosovës.
Në një postim në Facebook, ajo ka theksuar se e drejta e votës për mërgatën nuk guxon të mbetet vetëm në letër.
Sipas saj, ajo duhet të mundësohet kudo dhe për të gjithë.
“Zhurmaxhinjtë, të cilët kaq herët paska filluar t’i pengojë mundësimi i votimit të mërgatës në ambasada dhe misione anekënd botës, i këshilloj të qetësohen dhe të studiojnë ligjin. Ka kaluar njëherë e përgjithmonë koha kur për motive të ulëta politike, vota e mërgatës pamundësohej dhe gjymtohej deri në ekstrem”, ka shkruar ajo në Facebook.
Gërvalla ka theksuar se mërgata në zgjedhjet e 9 shkurtit 2025 do të mund të votojë pa barriera burokratike dhe administrative dhe për herë të parë edhe në ambasada dhe konsullata, por edhe përmes postës.