Zëvendëskryeministrja dhe ministrja e Punëve të Jashtme dhe Diasporës, Donika Gërvalla, në margjina të takimit të ministrave të BE-së me ministrat e shteteve që kanë një perspektivë të anëtarësimit në BE, pra të Ballkanit Perëndimor, të Turqisë, të Ukrainës, të Gjeorgjisë dhe të Moldavisë, pati një takim me ministrin e Çështjeve Evropiane të Finlandës, Anders Adlercreutz.
Në një komunikatë për medie nga MPJD-ja thuhet se gjatë takimit është diskutuar për procesin e anëtarësimit të Kosovës në KiE.
Republika e Kosovës, thotë Gërvalla, i ka plotësuar të gjitha kushtet për anëtarësim në Këshillin e Evropës, gjë që u konfirmua me 82% të votave nga Asambleja Parlamentare e KiE.
“Në takim u diskutua për procesin e anëtarësimit të Kosovës në Këshillin e Evropës, sukseset e jashtëzakonshme të Kosovës në ngritjen e standardeve të demokracisë dhe shtetit ligjor, përparimin në ekonomi dhe perspektivën euroatlanktike të Kosovës”, thuhet në njoftimin e MPJD-së.
Duke vlerësuar gjendjen e të drejtave të njeriut dhe atyre të komuniteteve joshumicë, Gërvalla shprehu mirënjohjen e saj për mbështetjen e vazhdueshme të Finlandës.