Trupi i pajetë i një 26-vjeçari është gjetur sot, më 14 janar, rreth orës 08:20, në lumin “Drini i Bardhë”, afër urës së fshatit Rugovë, në Prizren.
Zëdhënësi i Policisë së Kosovës për rajonin e Prizrenit, Shaqir Bytyqi, ka njoftuar se një qytetar ka vërejtur trupin dhe ka njoftuar menjëherë policinë.
Sipas Bytyqit, pas marrjes së informacionit, hetuesit dhe zyrtarët nga Drejtoria Rajonale e Policisë së Gjakovës kanë shkuar në vendngjarje, ku kanë konstatuar praninë e trupit të pajetë.
“Më datë 14.01.2025, rreth orës 08:20, policia është informuar se një qytetar e ka vërejtur një trup të pajetë në lumin “Drini i Bardhë” në afërsi të urës së fshatit Rugovë. Me të marr këtë informacion, hetuesit nga Sektori Rajonal i Hetimeve në Prizren dhe zyrtar nga Drejtoria Rajonale e Policisë së Gjakovës kanë dalë në vend ngjarje, ku kanë vërejtur një trup të pajetë”, ka thënë Bytyqi.
Pasi janë kontrolluar rrobat e viktimës, është gjetur dokumentacion personal me emrin Arban Hisari, i lindur më 05.06.1998, i cili ishte raportuar si i zhdukur nga familjarët disa ditë më parë.
Rrobat që kishte viktima përputhen me ato që ishin përshkruar në raportin e zhdukjes.
“Pas kontrollimit të viktimës nga njësit përkatëse, në rrobat e viktimës janë gjetur dokumentacion personal në emër të Arban HISARI, 05.06.1998 si dhe rrobat të cilat i kishte viktima, ishin të njëjtat sikur në ditën kur është raportuar i zhdukur nga familjarët, andaj besohet se trupi i pajetë është i viktimës së lartcekur. Për rastin është informuar edhe prokurori i shtetit”, ka thënë Bytyqi.
Kërkimet për të kishin nisur javën e kaluar.
Për këtë rast është njoftuar edhe prokurori i shtetit, dhe hetimet për shkaqet e vdekjes vazhdojnë.